शहादा, दि. १६
गेल्या अनेक दिवसांपासून अंधाराच्या साम्राज्यात अडकलेली शहादा शहरातील बायपास रस्त्यावरील डोंगरगाव चौफुली अखेर पुन्हा प्रकाशाने उजळून निघाली आहे. येथील बंद पडलेले हायमास्ट लाईट पूर्ववत सुरू करण्यात आल्याने स्थानिक नागरिक आणि वाहनधारकांनी सुटकेचा श्वास सोडला आहे.
डोंगरगाव चौफुली परिसरात नेहमीच वाहनांची आणि नागरिकांची मोठी वर्दळ असते. मात्र, हायमास्ट लाईट बंद असल्याने रात्रीच्या वेळी अपघाताचा धोका वाढला होता. अंधारामुळे सुरक्षिततेचा प्रश्न निर्माण झाला होता. ही गंभीर बाब लक्षात घेऊन शहादा नगरपरिषदेच्या उपनगराध्यक्षा सौ. माधवीताई मकरंद पाटील यांनी तातडीने पाठपुरावा सुरू केला. त्यांच्या सातत्यपूर्ण प्रयत्नांमुळे आणि प्रशासनाशी केलेल्या समन्वयामुळे हा प्रश्न अखेर मार्गी लागला.
हायमास्ट लाईट सुरू झाल्याने परिसर पुन्हा प्रकाशमय झाला असून, दररोज या मार्गाने प्रवास करणारे शेतकरी, विद्यार्थी, नोकरदार आणि स्थानिक नागरिकांना मोठा दिलासा मिळाला आहे. नागरिकांनी या कामाबद्दल उपनगराध्यक्षा सौ. माधवीताई पाटील यांचे आभार व्यक्त केले आहेत.
यावेळी भावना व्यक्त करताना माधवीताई पाटील म्हणाल्या, “जनतेच्या चेहऱ्यावर समाधान दिसले की काम केल्याचे खरे समाधान मिळते. जनसेवा हेच आमचे ध्येय असून शहराच्या विकासासाठी आणि नागरिकांच्या सुरक्षिततेसाठी आमचे प्रयत्न पुढेही सुरू राहतील.”
