महालक्ष्मी मंदिर परिसरातील बांधकामप्रकरणी १२ जून २०२६ पर्यंत स्पष्टीकरण सादर करण्याचे आदेश
सातारा | प्रतिनिधी
शिवथर ग्रामपंचायत हद्दीतील महालक्ष्मी मंदिर परिसरात सुरू असलेल्या बांधकाम प्रकरणाची गंभीर दखल घेत सातारा जिल्हा न्यायालयाने शिवथर ग्रामपंचायतीला कारणे दाखवा नोटीस बजावली आहे.
या प्रकरणात ग्रामपंचायतीसह पंचायत समिती व बांधकाम विभागाच्या उपअभियंत्यांनाही नोटीस पाठवण्यात आली असून, संबंधित बांधकामाबाबत आपले म्हणणे आणि आवश्यक कागदपत्रे न्यायालयात सादर करण्याचे निर्देश देण्यात आले आहेत.
न्यायालयाने संबंधित यंत्रणांना १२ जून २०२६ पर्यंत आपली बाजू मांडण्यास सांगितले आहे. मंदिर परिसरात सुरू असलेल्या कामकाजाच्या वैधतेबाबत आणि नियमांचे पालन झाले आहे का, याची चौकशी न्यायालयाकडून केली जात असल्याची माहिती समोर आली आहे.
या नोटिशीमुळे परिसरात चर्चेला उधाण आले असून, पुढील सुनावणीकडे ग्रामस्थांचे लक्ष लागले आहे.
