शहादा | दि. १७ | प्रतिनिधी
भारतीय जनता पार्टी, नंदुरबार जिल्ह्याच्या वतीने आयोजित पंडित दीनदयाल उपाध्याय प्रशिक्षण महाभियान अंतर्गत शहादा येथे दि. १६ व १७ मे रोजी दोन दिवसीय निवासी कार्यकर्ता प्रशिक्षण कार्यशाळा उत्साहात पार पडली.
आगामी काळातील संघटनात्मक बांधणी आणि कार्यकर्त्यांची वैचारिक जडणघडण मजबूत करण्याच्या उद्देशाने आयोजित करण्यात आलेली ही कार्यशाळा विशेष महत्त्वाची ठरली.
कार्यशाळेचे उद्घाटन भाजपचे नंदुरबार जिल्हा प्रभारी बबनराव चौधरी यांच्या हस्ते दीपप्रज्वलन करून करण्यात आले. यावेळी भारतमाता, पंडित दीनदयाल उपाध्याय आणि स्वातंत्र्यवीर सावरकर यांच्या प्रतिमांचे पूजन करण्यात आले. कार्यक्रमाच्या अध्यक्षस्थानी भाजप जिल्हाध्यक्ष निलेश माळी होते.
या निवासी प्रशिक्षण शिबिराला आमदार राजेश पाडवी, माजी खासदार डॉ. हिनाताई गावित, प्रदेश सदस्य डॉ. शशिकांत वाणी, प्रा. पंकज पाठक, शहादा नगरपालिका उपनगराध्यक्षा सौ. माधवीताई मकरंद पाटील, जिल्हा महामंत्री सदानंद रघुवंशी, कैलास चौधरी, डॉ. सत्यानंद गावित, जिल्हा उपाध्यक्ष जयपालसिंह रावल यांच्यासह जिल्ह्यातील विविध आघाड्यांचे प्रमुख, तालुकाध्यक्ष, शहराध्यक्ष आणि कार्यकर्ते मोठ्या संख्येने उपस्थित होते.
या कार्यशाळेत पक्षाचा इतिहास, संघटनात्मक कौशल्य, सध्याची राजकीय परिस्थिती, केंद्र व राज्य शासनाच्या लोककल्याणकारी योजना तसेच सोशल मीडियाचा प्रभावी वापर यांसारख्या विविध विषयांवर तज्ज्ञ वक्त्यांनी मार्गदर्शन केले.
पंडित दीनदयाल उपाध्याय यांच्या अंत्योदय विचारसरणीवर आधारित पक्षाची ध्येयधोरणे तळागाळातील कार्यकर्त्यांपर्यंत पोहोचवणे हा या प्रशिक्षण शिबिराचा मुख्य उद्देश असल्याचे मान्यवरांनी सांगितले.
शहादा शहरातील व्हीएसएस लॉन्स येथे आयोजित या निवासी प्रशिक्षण शिबिरासाठी चोख व्यवस्था करण्यात आली होती. कार्यशाळा यशस्वी करण्यासाठी शहर व तालुका भाजप पदाधिकारी आणि कार्यकर्त्यांनी विशेष परिश्रम घेतले.
