कन्नड | प्रतिनिधी
कन्नड शहरातील कायदा व सुव्यवस्था अधिक मजबूत करण्यासाठी तसेच नागरिकांच्या सुरक्षेला प्राधान्य देत अत्याधुनिक सीसीटीव्ही निगराणी प्रकल्प कार्यान्वित करण्यात आला आहे. छत्रपती संभाजीनगर ग्रामीण पोलीस अंतर्गत कन्नड शहर पोलीस ठाणे आवारात उभारण्यात आलेल्या या प्रकल्पाचा उद्घाटन सोहळा उत्साहात पार पडला.
या प्रकल्पाचे उद्घाटन मा. श्री. संजयजी शिरसाट यांच्या हस्ते फीत कापून व नियंत्रण कक्षाचे उद्घाटन करून करण्यात आले.
२४ तास शहरावर राहणार नजर
या प्रकल्पांतर्गत कन्नड शहरातील प्रमुख चौक, प्रवेशद्वारे, गर्दीची ठिकाणे आणि संवेदनशील भागांमध्ये अत्याधुनिक हाय-डेफिनिशन सीसीटीव्ही कॅमेरे बसविण्यात आले आहेत. पोलीस ठाण्यातील नियंत्रण कक्षातून संपूर्ण शहरावर २४ तास नजर ठेवली जाणार आहे.
या प्रणालीमुळे चोऱ्या, छेडछाड, वाहतूक कोंडी तसेच इतर गुन्हेगारी घटनांवर नियंत्रण ठेवण्यास मदत होणार असून, गुन्हेगारांचा शोध घेणे अधिक सुलभ होणार असल्याचे पोलिसांकडून सांगण्यात आले.
नागरिकांकडून स्वागत
उद्घाटन कार्यक्रमाला पोलीस विभागातील वरिष्ठ अधिकारी, लोकप्रतिनिधी, व्यापारी, प्रतिष्ठित नागरिक आणि पत्रकार मोठ्या संख्येने उपस्थित होते. आधुनिक तंत्रज्ञानाच्या माध्यमातून शहर सुरक्षित करण्याच्या या उपक्रमाचे उपस्थितांनी स्वागत करत समाधान व्यक्त केले.
