प्रतिनिधी, वर्धा :
वर्धा शहर पोलिसांनी धाडसी कारवाई करत चारचाकी वाहनांचा पाठलाग करून तब्बल १२ लाख ९५ हजार २०० रुपयांचा विदेशी दारूसाठा आणि वाहन जप्त केले आहे. मात्र, दारूविक्री करणारे आरोपी पोलिसांना चकवा देत पसार होण्यात यशस्वी झाले.
मिळालेल्या माहितीनुसार, दि. १५ मे २०२६ रोजी वर्धा शहर पोलीस ठाण्याचे पथक पेट्रोलिंग करत असताना पोलीस उपनिरीक्षक उमेश उगले यांना गुप्त माहिती मिळाली की, एमएच-१२-डब्ल्यूयू-३१३३ क्रमांकाच्या चारचाकी वाहनातून देशी-विदेशी दारू विक्रीसाठी नेण्यात येत आहे.
माहिती मिळताच पोलिसांनी तत्काळ सापळा रचून वाहन थांबविण्याचा प्रयत्न केला. कारागृह परिसरात वाहन थांबले असता आरोपी वाहन सोडून पळून गेले. पोलिसांनी त्यांचा पाठलाग समृद्धी महामार्गावर आमगावपर्यंत केला. मात्र आरोपी अंधाराचा फायदा घेत पसार झाले.
यानंतर पोलिसांनी वाहनाची तपासणी केली असता त्यामध्ये मोठ्या प्रमाणात विदेशी दारूसाठा आढळून आला.
जप्त मुद्देमाल
- आरएस ब्रँडच्या १६ पेट्या – अंदाजे ₹३,०७,२००
- ओसी ब्रँडच्या १९ पेट्या – अंदाजे ₹२,७३,६००
- आयबी ब्रँडच्या १९ पेट्या – अंदाजे ₹१४,४००
- चारचाकी वाहन – अंदाजे ₹७,००,०००
असा एकूण ₹१२,९५,२०० किमतीचा मुद्देमाल जप्त करण्यात आला.
ही कारवाई पोलीस अधीक्षक सौरभ कुमार अग्रवाल, अप्पर पोलीस अधीक्षक सदाशिव वाघमारे, उपविभागीय पोलीस अधिकारी प्रमोद मकेश्वर यांच्या मार्गदर्शनाखाली वर्धा शहर पोलीस ठाण्याचे निरीक्षक संतोष ताले यांच्या नेतृत्वात पोलीस उपनिरीक्षक उमेश उगले, पोलीस शिपाई अनिल चव्हाण, आकाश कुंभरे, पोलिस हवालदार पंकज भरणे व लोभेश गाडवे यांनी केली.
