वनराज आंदेकर खून प्रकरणातील आरोपीच्या भावाची हत्या; शहरात खळबळ
चिंचवड | प्रतिनिधी
पुण्यातील धनकवडी परिसरातील बालाजी नगर बस स्टॉपवर माजी नगरसेवक वनराज आंदेकर खून प्रकरणातील आरोपी आकाश मस्केचा भाऊ अक्षय बापू मस्के उर्फ बाळा मस्के (वय २६, रा. आंबेगाव पठार) याची भरदिवसा गोळ्या झाडून निर्घृण हत्या करण्यात आल्याची धक्कादायक घटना समोर आली आहे. या घटनेमुळे पुणे शहर पुन्हा एकदा हादरले असून नागरिकांमध्ये भीतीचे वातावरण निर्माण झाले आहे.
मिळालेल्या प्राथमिक माहितीनुसार, बाळा मस्के हा बालाजी नगर बस स्टॉपवर उभा असताना अज्ञात हल्लेखोरांनी त्याच्यावर अचानक गोळीबार केला. हल्लेखोरांनी त्याला कोणतीही संधी न देता जागीच ठार केले. हा हल्ला पूर्वनियोजित असल्याचा संशय व्यक्त केला जात असून, वनराज आंदेकर खून प्रकरणाचा बदला घेण्यासाठीच ही हत्या करण्यात आल्याची चर्चा परिसरात सुरू आहे.
माजी नगरसेवक वनराज आंदेकर यांची सप्टेंबर २०२४ मध्ये निर्घृण हत्या करण्यात आली होती. या प्रकरणात आकाश मस्के हा मुख्य आरोपींपैकी एक असून तो सध्या पोलीस कोठडीत आहे. आंदेकर हत्या प्रकरणानंतर निर्माण झालेल्या वैमनस्यातूनच आता आकाश मस्केच्या भावाला लक्ष्य करण्यात आल्याची शक्यता पोलिसांकडून तपासली जात आहे.
घटनेनंतर पुणे पोलिसांनी परिसरात मोठा बंदोबस्त तैनात केला असून हल्लेखोरांचा शोध सुरू करण्यात आला आहे. शहरातील वाढत्या गँगवॉर आणि गुन्हेगारी घटनांमुळे कायदा व सुव्यवस्थेचा प्रश्न पुन्हा ऐरणीवर आला आहे.
