बीड | प्रतिनिधी
राज्याच्या गृह विभागाने ४८८ पोलीस उपनिरीक्षकांना सहाय्यक पोलीस निरीक्षक (एपीआय) पदावर पदोन्नती देत त्यांच्या पदस्थापनेचे आदेश जारी केले आहेत. यामध्ये बीड जिल्ह्यातील ८ पोलीस उपनिरीक्षकांचा समावेश असून त्यांची जिल्ह्याबाहेर बदली करण्यात आली आहे.
राज्य शासनाकडून पोलीस दलातील अधिकाऱ्यांच्या पदोन्नतीची प्रक्रिया पूर्ण करण्यात आली असून नव्याने पदोन्नती मिळालेल्या अधिकाऱ्यांना विविध ठिकाणी नियुक्त्या देण्यात आल्या आहेत.
बीड जिल्ह्यात कार्यरत असलेल्या अधिकाऱ्यांपैकी प्रदीप टूबे, संदीप जाधव आणि प्रदीप गाडे यांची छत्रपती संभाजीनगर येथे नियुक्ती करण्यात आली आहे. निशिगंधा खुळे यांची पुणे येथे, रवींद्र पवार यांची नाशिक परिक्षेत्रात, प्रदीप साळुंके यांची मुंबई शहरात, अनंत तांगडे यांची मीरा-भाईंदर येथे तर शालिनी गजभारे यांची ठाणे येथे नियुक्ती करण्यात आली आहे.
विशेष म्हणजे, बीड जिल्ह्यात कोणत्याही अधिकाऱ्याला पदस्थापना देण्यात आलेली नाही. गृह विभागाच्या या निर्णयामुळे संबंधित अधिकाऱ्यांमध्ये आनंदाचे वातावरण असले तरी जिल्ह्याबाहेर बदली झाल्याने चर्चा रंगू लागल्या आहेत.
