ब्रम्हपुरी, ता. प्र. दि. १९ :
वर्धा–चंद्रपूर–गडचिरोली स्थानिक प्राधिकारी मतदारसंघाची निवडणूक येत्या १८ जून २०२६ रोजी पार पडणार असून, तिन्ही जिल्ह्यांतील स्थानिक स्वराज्य संस्थांचे एकूण ९७७ सदस्य मतदानाचा हक्क बजावणार आहेत. निवडणुकीच्या पार्श्वभूमीवर १८ मेपासून आदर्श आचारसंहिता लागू करण्यात आली असून, सर्व संबंधितांनी तिचे काटेकोर पालन करावे, असे आवाहन निवडणूक निर्णय अधिकारी तथा चंद्रपूर जिल्हाधिकारी वसुमना पंत यांनी केले आहे.
जिल्हाधिकारी कार्यालयात आयोजित पत्रकार परिषदेत त्या बोलत होत्या. यावेळी उपजिल्हा निवडणूक अधिकारी संजीव देशमुख आणि निवासी उपजिल्हाधिकारी दगडू कुंभार उपस्थित होते.
जिल्हानिहाय मतदारसंख्या
या निवडणुकीत चंद्रपूर जिल्ह्यातील सर्वाधिक ४६९ सदस्य मतदान करणार आहेत. यामध्ये चंद्रपूर महानगरपालिकेचे ६६ सदस्य तसेच जिल्ह्यातील १० नगर परिषद आणि ७ नगर पंचायतींच्या सदस्यांचा समावेश आहे.
वर्धा जिल्ह्यातील १० नगर परिषदांमधील २६४ सदस्य मतदार असतील, तर गडचिरोली जिल्ह्यातील ३ नगर परिषद आणि ९ नगर पंचायतींतील २४४ सदस्य मतदान करणार आहेत. तिन्ही जिल्ह्यांतील जिल्हा परिषद सदस्यांची संख्या सध्या शून्य असल्याची माहिती देण्यात आली.
१७ मतदान केंद्रांची व्यवस्था
निवडणुकीसाठी तिन्ही जिल्ह्यांतील प्रत्येक उपविभागीय मुख्यालयात मतदान केंद्र उभारण्यात येणार असून, एकूण १७ मतदान केंद्र निश्चित करण्यात आली आहेत. या निवडणुकीची मतमोजणी चंद्रपूर जिल्हा स्तरावर होणार आहे.
केंद्रीय निरीक्षकांची नियुक्ती
निवडणूक प्रक्रिया पारदर्शक आणि निष्पक्ष पार पाडण्यासाठी केंद्रीय निवडणूक आयोगाकडून स्वतंत्र निवडणूक निरीक्षक नियुक्त करण्यात येणार असल्याचेही जिल्हाधिकारी वसुमना पंत यांनी सांगितले.
