ब्रम्हपुरी, ता.प्र. २० मे २०२६ :
राज्यातील स्पर्धा परीक्षा, सरकारी नोकरी भरती, आरक्षण धोरण, नीट परीक्षा घोटाळा तसेच मतदार पुनरिक्षण प्रक्रियेसंदर्भात काँग्रेस पक्षाच्या अनुसूचित जाती व अल्पसंख्याक विभागाच्या वतीने तहसीलदारांमार्फत मुख्यमंत्री तथा अल्पसंख्याक विकास मंत्र्यांना निवेदन देण्यात आले.
निवेदनात स्पर्धा परीक्षा व सरकारी नोकरी भरतीमध्ये राखीव प्रवर्गातील उमेदवारांबाबत शासनाने घेतलेल्या निर्णयाचा पुनर्विचार करण्याची मागणी करण्यात आली. तसेच अनुसूचित जाती उपवर्गीकरणासाठी नेमलेल्या बदर समितीचा अहवाल अमान्य करावा, अशी मागणीही करण्यात आली.
नीट परीक्षेतील कथित गैरप्रकारामुळे विद्यार्थी आणि पालकांना मोठा मानसिक त्रास सहन करावा लागत असल्याचे नमूद करत दोषींवर कठोर कारवाई करण्याची मागणी करण्यात आली. विद्यार्थ्यांच्या भवितव्याशी खेळ करणाऱ्यांविरोधात शासनाने तातडीने ठोस पावले उचलावीत, असे निवेदनात म्हटले आहे.
तसेच विशेष संक्षिप्त पुनरिक्षण प्रक्रियेदरम्यान “मिसिंग” म्हणून दर्शविण्यात आलेल्या मतदारांचे फॉर्म क्रमांक ६ स्वीकारून त्यांची तात्काळ नोंदणी व मॅपिंग करण्यात यावे, अशी मागणी करण्यात आली. मतदानाचा घटनात्मक अधिकार सुरक्षित ठेवण्यासाठी शासनाने सकारात्मक भूमिका घ्यावी, असेही काँग्रेस पदाधिकाऱ्यांनी स्पष्ट केले.
निवेदन देताना तालुका काँग्रेस अध्यक्ष खेमराज तिडके, शहर काँग्रेस अध्यक्ष हितेंद्र राऊत, अनुसूचित जाती विभाग अध्यक्ष सुधाकर पोपटे, कार्याध्यक्ष ज्ञानेश्वर मेश्राम, अल्पसंख्याक सेल तालुकाध्यक्ष शहबाज खान, कार्याध्यक्ष मोहसीन कुरेशी, नगराध्यक्ष योगेश मिसार, न.प. उपाध्यक्ष डॉ. नितीन उराडे, माजी जि.प. सदस्य डॉ. राजेश कांबळे, प्रदेश काँग्रेस सचिव डॉ. थानेश्वर कायरकर, युवक काँग्रेस अध्यक्ष सोनू नाकतोडे, नगरसेवक मोंटु पिलारे, नगरसेवक अनुकुल शेंडे, ओबीसी सेल अध्यक्ष राकेश पडोळे यांच्यासह मोठ्या संख्येने काँग्रेस पदाधिकारी, नगरसेवक, महिला पदाधिकारी आणि कार्यकर्ते उपस्थित होते.
