धुळे : जागतिक मधुमक्षिका दिनानिमित्त कृषी विज्ञान केंद्र, धुळे येथे लुपिन फाउंडेशन आणि एम. एस. स्वामीनाथन रिसर्च फाउंडेशन यांच्या संयुक्त विद्यमाने विस्तार कार्यकर्ते व शेतकऱ्यांसाठी “आधुनिक मधमाशी पालन” या विषयावर एकदिवसीय प्रशिक्षण कार्यक्रम उत्साहात पार पडला.
कार्यक्रमाच्या अध्यक्षस्थानी कृषी महाविद्यालय, धुळे येथील सहयोगी अधिष्ठाता डॉ. बबनराव इल्हे होते. यावेळी कृषी विज्ञान केंद्राचे प्रभारी कार्यक्रम समन्वयक श्री. रोहित कडू, प्रशिक्षण समन्वयक व शास्त्रज्ञ डॉ. पंकज पाटील, शास्त्रज्ञ सौ. अमृता राऊत, श्री. जगदीश काथेपुरी, डॉ. धनराज चौधरी, डॉ. आतिश पाटील, लुपिन फाउंडेशनचे श्री. गौरव पाटील, श्री. रवी देशमुख तसेच एम. एस. स्वामीनाथन रिसर्च फाउंडेशनचे श्री. गोकुळ खलाणे आदी मान्यवर उपस्थित होते.
अध्यक्षीय समारोप करताना डॉ. बबनराव इल्हे यांनी शेती उत्पादन वाढीसाठी आणि पर्यावरण संतुलन राखण्यासाठी मधमाशांचे महत्त्व अधोरेखित केले. तसेच भारत सरकारच्या संतुलित खत वापर अभियानाबाबत श्री. रोहित कडू यांनी उपस्थितांना मार्गदर्शन केले.
कार्यक्रमाचे प्रास्ताविक डॉ. पंकज पाटील यांनी केले. त्यांनी आधुनिक मधमाशी पालन, मित्र किडींचे संवर्धन तसेच मध उत्पादन तंत्रज्ञान याविषयी सविस्तर माहिती दिली. नैसर्गिक आणि सेंद्रिय शेतीमध्ये शेतीपूरक निविष्ठांचा वापर याविषयी डॉ. आतिश पाटील यांनी मार्गदर्शन केले. तर मधाचे पोषणमूल्य, त्याचे आरोग्यदायी फायदे आणि विविध प्रक्रिया उत्पादने याबाबत सौ. अमृता राऊत यांनी माहिती दिली.
कार्यक्रमाचे सूत्रसंचालन डॉ. धनराज चौधरी यांनी केले तर आभार प्रदर्शन श्री. गोकुळ खलाणे यांनी मानले.
या प्रशिक्षण कार्यक्रमाला मोठ्या संख्येने शेतकरी आणि विस्तार कार्यकर्त्यांची उपस्थिती लाभली. कार्यक्रमाच्या यशस्वी आयोजनासाठी कुणाल राजळे, जीवन राणे, रमेश शिंदे तसेच मधुसूदन अहिरे यांनी विशेष सहकार्य केले.
