बुलढाणा
बुलढाणा जिल्ह्यातील सिंदखेडराजा तालुक्यात दुसरबीड-राहेरी येथील वाळू घाटावर वार्तांकनासाठी गेलेल्या पत्रकार रामदास कहाळे यांच्यावर झालेल्या कथित हल्ल्याच्या निषेधार्थ पत्रकार संघटना आक्रमक झाल्या आहेत. या प्रकरणी दोषींवर कठोर कारवाई करण्यात यावी, या मागणीसाठी पत्रकार संघटनांनी बुधवारी उपविभागीय अधिकारी प्रा. संजय खडसे यांना निवेदन सादर केले.
मिळालेल्या माहितीनुसार, पत्रकार रामदास कहाळे हे वाळू घाटावरील घडामोडींचे लाईव्ह वार्तांकन करत असताना वाळू वाहतूकदार, कंत्राटदार आणि त्यांच्या साथीदारांनी त्यांच्यावर हल्ला करून मारहाण केल्याचा आरोप निवेदनात करण्यात आला आहे. या घटनेमुळे तालुक्यातील पत्रकारांमध्ये तीव्र संताप व्यक्त केला जात आहे.
विशेष म्हणजे, पीडित पत्रकारावरच किनगाव राजा पोलीस ठाण्यात गुन्हा दाखल करण्यात आल्याने पत्रकार संघटनांनी नाराजी व्यक्त केली आहे. “पत्रकारावर झालेल्या हल्ल्याची निष्पक्ष चौकशी करून संबंधित दोषींना तात्काळ अटक करावी तसेच पत्रकारावर दाखल करण्यात आलेला खोटा गुन्हा मागे घ्यावा,” अशी मागणी निवेदनाद्वारे करण्यात आली.
या निवेदनावर मुकुंद पाठक, नंदू वाघमारे, गजानन मेहेत्रे, राहुल झोटे, देवानंद झोटे, भगवान साळवे, विजय भालमोडे, बुद्धू चौधरी, शेख जाकेर, सुरेश हुसे, ज्ञानेश्वर बुधवत, छगन झोरे, रफिक शेख, अनिल दराडे, रवी ढवळे यांच्यासह तालुक्यातील १६ हून अधिक पत्रकारांच्या स्वाक्षऱ्या आहेत.
दरम्यान, प्रशासनाने तातडीने कारवाई न केल्यास पत्रकार संघटनांच्या वतीने तीव्र आंदोलन छेडण्यात येईल, असा इशाराही यावेळी देण्यात आला आहे.
