पनवेल | प्रतिनिधी :
प्रादेशिक परिवहन कार्यालय, पनवेल यांच्या वतीने रस्ता सुरक्षा आणि वाहतूक नियमांचे काटेकोर पालन व्हावे यासाठी विशेष तपासणी मोहिम सातत्याने राबविण्यात येत आहे. नागरिकांनी रस्ते अपघातांचे प्रमाण कमी करण्यासाठी वाहतूक नियमांचे पालन करावे, तसेच वाहनांची आवश्यक कागदपत्रे अद्ययावत ठेवून सुरक्षित वाहन चालवावे, असे आवाहन सहायक प्रादेशिक परिवहन अधिकारी निलेश धोटे यांनी केले आहे.
सन 2025-2026 तसेच एप्रिल 2026 या कालावधीत पनवेल आरटीओकडून विविध नियमभंग करणाऱ्या वाहनांवर व्यापक कारवाई करण्यात आली. या मोहिमेत विना हेल्मेट वाहन चालविणे, अवैध विमा, वाहन चालविताना मोबाईलचा वापर, पीयूसी प्रमाणपत्र नसलेली वाहने, अवैध प्रवासी वाहतूक, विना नंबर प्लेट वाहने, ऑटो रिक्षा नियमभंग, ओव्हरलोड वाहतूक, वैध परवाना नसलेली वाहने आदी प्रकारांवर विशेष लक्ष केंद्रित करण्यात आले.
गौण खनिज आणि ओव्हरलोड मालवाहतूक करणाऱ्या वाहनांवरही विशेष तपासणी करण्यात आली. गेल्या दोन महिन्यांत अशा 235 वाहनांवर कारवाई करण्यात आली असून सुमारे 128.96 लाख रुपये तडजोड शुल्क वसूल करण्यात आले आहे. क्षमतेपेक्षा अधिक माल वाहतूक, नंबर प्लेट नसणे, मालावर ताडपत्री नसणे, रिफ्लेक्टर नसणे यांसारख्या दोषांवर ही कारवाई करण्यात आली.
या विशेष मोहिमेदरम्यान एकूण 26 हजार 539 दोषी वाहनांवर मोटार वाहन कायदा 1988 अंतर्गत कारवाई करण्यात आली असून 105.19 लाख रुपये तडजोड शुल्क वसूल करण्यात आले आहे.
कारवाईतील प्रमुख गुन्हे पुढीलप्रमाणे —
- विना हेल्मेट वाहन चालविणे : 11 हजार 243
- अवैध विमा : 5 हजार 973
- ओव्हरलोड मालवाहतूक : 2 हजार 349
- ताडपत्री नसलेली वाहने : 304
- विना नंबर प्लेट वाहने : 107
- वैध फिटनेस प्रमाणपत्र नसलेली वाहने : 3 हजार 703
- वाहन चालविताना मोबाईलचा वापर : 804
- पीयूसी प्रमाणपत्र नसलेली वाहने : 6 हजार 705
- वैध परवाना नसलेली वाहने : 2 हजार 816
- वेगमर्यादा ओलांडणे : 6 हजार 379
- ऑटो रिक्षा नियमभंग : 2 हजार 203
- अवैध प्रवासी वाहतूक : 535
- स्कूल बस नियमभंग : 229
- ओडिसी वाहतूक करणारी वाहने : 219
रस्ता सुरक्षेसाठी नागरिकांनी वाहतूक नियमांचे पालन करून प्रशासनास सहकार्य करावे, असे आवाहन प्रादेशिक परिवहन कार्यालयाने केले आहे.
