कुरुंदवाड | प्रतिनिधी :
कुरुंदवाड नगरपालिकेच्या सर्वसाधारण सभेत बुधवारी सत्ताधारी आणि विरोधी आघाडीच्या नगरसेवकांमध्ये जोरदार शाब्दिक खडाजंगी झाली. मागील सभेचे इतिवृत्त वाचून दाखविण्याच्या मुद्द्यावरून वाद निर्माण झाल्यानंतर विरोधी नगरसेवकांनी सभात्याग करत पालिकेच्या प्रवेशद्वारात घोषणाबाजी केली. दरम्यान, सत्ताधारी आघाडीने विषय पत्रिकेवरील सर्व १० विषय बहुमताने मंजूर केले.
छत्रपती शिवाजी महाराज सभागृहात सकाळी ११.३० वाजता ही सभा पार पडली. सभेच्या अध्यक्षस्थानी नगराध्यक्षा सौ. मनीषा डांगे होत्या. मुख्याधिकारी मनोजकुमार देसाई व उपनगराध्यक्ष दीपक गायकवाड यांची प्रमुख उपस्थिती होती.
सभेच्या सुरुवातीलाच मागील सभेचे इतिवृत्त वाचून कायम करण्याचा विषय चर्चेला आला. विरोधी आघाडीच्या नगरसेवकांनी इतिवृत्त सविस्तर वाचून दाखवण्याची मागणी केली. मात्र, सत्ताधारी नगरसेवकांनी मागील सभेत सर्व विषयांवर आधीच चर्चा झाल्याचे सांगत पुन्हा वाचनाची गरज नसल्याची भूमिका घेतली. यावरून दोन्ही गटांमध्ये वाद निर्माण झाला आणि विरोधी नगरसेवकांनी निषेध नोंदवत सभात्याग केला.
सभात्यागानंतर विरोधी नगरसेवकांनी पालिकेच्या मुख्य प्रवेशद्वारात घोषणाबाजी करत सत्ताधाऱ्यांवर मनमानी कारभाराचा आरोप केला.
सभेत विषय पत्रिकेवरील सर्व १० विषयांना मंजुरी देण्यात आली. यामध्ये पालिकेच्या जुन्या मुख्य इमारतीच्या खराब झालेल्या कौलांच्या दुरुस्तीचा विषय विशेष महत्त्वाचा ठरला. ऐतिहासिक वारसा जपण्यासाठी ‘हेरिटेज लुक’ कायम ठेवून दुरुस्ती करण्याचा निर्णय घेण्यात आला.
तसेच चालू वर्षाच्या कर आकारणीबाबत नगरसेवक जवाहर पाटील, अक्षय आलासे, वैभव उगळे आणि उपनगराध्यक्ष दीपक गायकवाड यांनी भूमिका मांडली. कुरुंदवाड शहर पूरग्रस्त असल्याने नागरिकांना दिलासा मिळावा यासाठी शासकीय नियमांच्या अधीन राहून कमीत कमी कर आकारणी करण्याचा निर्णय घेण्यात आला.
याशिवाय विकास आराखड्यातील गट क्रमांक १९८ मधील आरक्षण क्रमांक १९ अंतर्गत स्पोर्ट्स कॉम्प्लेक्सच्या जागेचा ताबा घेऊन पुढील कार्यवाही तातडीने सुरू करण्याचाही निर्णय सभेत घेण्यात आला.
बैठकीला उपनगराध्यक्ष दीपक गायकवाड, रमेश भुजूगडे (आण्णा), जवाहर पाटील, अक्षय आलासे, वैभव उगळे, जय कडाळे, तानाजी आलासे, दीपक परिट, प्रदीप चव्हाण, विशाल पाटील, शुभम जोंग तसेच नगरसेविका सुनंदा आलासे, अलका मधाळे, विमल पोमाजे, अलका पाटील, आयेशा बागवान, संगिता कर्नाळे, जयश्री पाटील, जुवेरिया गोलंदाज, रुक्साना बागवान, सुजाता जाधव उपस्थित होत्या.
“पालिकेचा कारभार पारदर्शक”
“नगरपालिकेचा कारभार पूर्णपणे कायदेशीर आणि पारदर्शक पद्धतीने सुरू आहे. सर्व नगरसेवकांना विश्वासात घेऊन विकासकामे केली जात आहेत. विरोधकांनी अभ्यास करून बोलावे. सभागृहात कोणाचीही दादागिरी खपवून घेतली जाणार नाही,” असे नगराध्यक्षा सौ. मनीषा डांगे यांनी सांगितले.
