सारथी महाराष्ट्राचा
यावल | प्रतिनिधी
यावल शहरासह तालुक्यात सध्या पेट्रोल आणि डिझेलचा तीव्र तुटवडा निर्माण झाल्याने नागरिकांना मोठ्या अडचणींचा सामना करावा लागत आहे. शहरातील काही पेट्रोल पंपांवरील इंधनसाठा पूर्णतः संपल्याने अनेक पंप तात्पुरते बंद ठेवण्यात आले असून, ज्या पेट्रोल पंपांवर काही प्रमाणात साठा उपलब्ध आहे त्या ठिकाणी वाहनधारकांनी मोठी गर्दी केली आहे. परिणामी शहरातील प्रमुख रस्त्यांवर वाहतुकीची कोंडी निर्माण होत असून नागरिकांमध्ये चिंतेचे वातावरण पसरले आहे.
सकाळपासूनच दुचाकी, चारचाकी तसेच मालवाहतूक वाहनांच्या लांबच लांब रांगा पेट्रोल पंपांबाहेर पाहायला मिळत आहेत. अनेक वाहनचालकांना तासन्तास प्रतीक्षा करूनही इंधन मिळत नसल्याची परिस्थिती निर्माण झाली आहे. काही ठिकाणी तर “स्टॉक संपला” असे फलक लावण्यात आल्याचे दिसून आले.
अचानक निर्माण झालेल्या या तुटवड्यामुळे शेतकरी, व्यावसायिक, प्रवासी तसेच दैनंदिन कामासाठी वाहनांवर अवलंबून असलेल्या नागरिकांचे मोठे हाल होत आहेत. दरम्यान, इंधन पुरवठा विस्कळीत झाल्याने तालुक्यातील ग्रामीण भागातही त्याचा परिणाम जाणवत असून अनेक वाहनधारकांना इंधनासाठी शहरात धाव घ्यावी लागत आहे. वाहतूकदार आणि खासगी वाहन चालकांमध्ये अस्वस्थता निर्माण झाली आहे.
आगामी काही दिवसांत परिस्थिती सुधारली नाही तर जनजीवनावर त्याचा गंभीर परिणाम होण्याची शक्यता व्यक्त केली जात आहे. पेट्रोल आणि डिझेलच्या दरवाढीबरोबरच देशातील काही भागांत इंधन पुरवठ्यावर ताण निर्माण झाल्याच्या बातम्यांमुळे नागरिकांमध्ये संभ्रमाचे वातावरण आहे.
नागरिकांनी घाबरून अतिरिक्त इंधनसाठा करण्याऐवजी संयम बाळगावा तसेच प्रशासनाने तातडीने पुरेसा इंधन पुरवठा उपलब्ध करून द्यावा, अशी मागणी वाहनधारकांकडून करण्यात येत आहे.
