सारथी महाराष्ट्राचा
कोरपावली | प्रतिनिधी
यावल तालुक्यातील सातपुडा पर्वतरांगांतील अतिदुर्गम भागांमध्ये नागरिकांना आरोग्य सुविधा उपलब्ध करून देण्यासाठी सावखेडा सिम प्राथमिक आरोग्य केंद्रातर्फे विशेष आरोग्य शिबिराचे आयोजन करण्यात आले. जामन्या, गाडऱ्या आणि उसमळी या दुर्गम गावांमध्ये दि. १९ मे रोजी हे आरोग्य शिबिर पार पडले.
जिल्हा आरोग्य अधिकारी डॉ. सचिन भायेकर तसेच तालुका आरोग्य अधिकारी डॉ. राजू तडवी यांच्या मार्गदर्शनाखाली धरती आभा उन्नत ग्राम योजना व “माझे गाव आरोग्य संपन्न गाव” अभियानांतर्गत हे शिबिर घेण्यात आले.
या आरोग्य शिबिरात विविध आजारांची तपासणी करण्यात आली. गरोदर माता आणि लहान बालकांची आरोग्य तपासणी करण्यात आली तसेच एनसीडी (NCD) अंतर्गत रक्तदाब व शुगर तपासणी करून गरजू रुग्णांना आवश्यक औषधांचे वाटप करण्यात आले. पॅलिएटिव्ह केअर अंतर्गत रुग्णांच्या भेटी घेऊन त्यांच्या आरोग्यस्थितीची माहितीही घेण्यात आली.
शिबिरादरम्यान नागरिकांना विविध आरोग्य योजनांची माहिती देण्यात आली. “आपले आरोग्य आपल्या हाती” या संकल्पनेतून आरोग्यविषयक काळजी, स्वच्छता आणि प्रतिबंधात्मक उपाययोजनांबाबत मार्गदर्शन करण्यात आले. उसमळी येथे लसीकरण मोहिमाही राबविण्यात आली.
या आरोग्य शिबिराचा एकूण १३५ नागरिकांनी लाभ घेतला. शिबिराच्या यशस्वी आयोजनासाठी डॉ. निलेश अग्रवाल, डॉ. उज्वला भंगाळे, डॉ. प्रवीण ठाकरे (मनसेवी वैद्यकीय अधिकारी), हिराबाई पाडवी, योगिता पाटील, शमीबाई बारेला, आशा वर्कर, हेमंत पवार, पुनम गावंडे, आशा पाटील, पुष्पा पाटील, रेखा बारेला, हनीफ तडवी, हेमांगी फेगडे, नसीम पिंजारी, समीम तडवी यांच्यासह आरोग्य विभागातील कर्मचारी व सेवकांनी विशेष परिश्रम घेतले.
