लाचलुचपत प्रतिबंधक विभागाची देवगाव रंगारी येथे कारवाई
कन्नड | प्रतिनिधी :
कन्नड तालुक्यातील देवगाव रंगारी येथे शासनाच्या “मागेल त्याला सौर ऊर्जा” योजनेअंतर्गत मंजूर झालेल्या कृषी पंपाच्या कामासाठी एक हजार रुपयांची लाच स्वीकारताना विद्युत विभागातील कर्मचाऱ्याला लाचलुचपत प्रतिबंधक विभागाने रंगेहाथ पकडले.
मिळालेल्या माहितीनुसार, तक्रारदार शेतकऱ्याचा कृषी सौर पंप शासनाच्या योजनेअंतर्गत मंजूर झाला होता. या प्रक्रियेसाठी जागेचा सर्व्हे करणे आवश्यक होते. त्यासाठी आरोपी संदीप शिंदे, मुख्य ऑपरेटर (देवगाव रंगारी) याने लाभार्थ्याकडे एक हजार रुपयांच्या लाचेची मागणी केली होती. मात्र, तक्रारदार लाच देण्यास तयार नसल्याने त्यांनी लाचलुचपत प्रतिबंधक विभागाकडे तक्रार दाखल केली.
तक्रारीची पडताळणी पंचांसमक्ष करण्यात आली असता, लाचेची मागणी झाल्याचे निष्पन्न झाले. त्यानंतर मंगळवारी लाचलुचपत प्रतिबंधक विभागाने सापळा रचून आरोपी संदीप शिंदे याला एक हजार रुपयांची लाच स्वीकारताना ताब्यात घेतले.
ही कारवाई पोलीस अधीक्षक माधुरी केदार कांगणे, अपर पोलीस अधीक्षक शशिकांत शिनगारे यांच्या मार्गदर्शनाखाली पोलीस उपनिरीक्षक राजीव तळेकर यांनी केली असून पुढील तपास सुरू आहे.
