शहादा | दि. २१ | खास प्रतिनिधी
शहादा शहरातील रस्त्यांवर मोठ्या प्रमाणात खड्डे पडल्याने वाहनचालक आणि नागरिकांना मोठ्या त्रासाला सामोरे जावे लागत आहे. आगामी पावसाळा लक्षात घेता शहरातील सर्व रस्त्यांची तातडीने दुरुस्ती करून खड्डे बुजवावेत, अन्यथा शिवसेनेच्या वतीने तीव्र आंदोलन छेडण्यात येईल, असा इशारा शिवसेना शहादा तालुकाप्रमुख मनलेश ए. जायसवाल यांनी दिला आहे. यासंदर्भात त्यांनी शहादा नगरपालिकेच्या मुख्याधिकाऱ्यांना निवेदन सादर केले.
निवेदनात नमूद करण्यात आले आहे की, शहादा नगरपालिकेच्या हद्दीतील प्रमुख तसेच अंतर्गत रस्त्यांची अवस्था अत्यंत दयनीय झाली आहे. खड्ड्यांमुळे दुचाकी आणि चारचाकी चालकांना जीव मुठीत धरून प्रवास करावा लागत असून, खड्डे चुकवण्याच्या प्रयत्नात दररोज लहान-मोठे अपघात घडत आहेत. परिणामी वाहनधारकांमध्ये वाद निर्माण होऊन कायदा व सुव्यवस्थेचाही प्रश्न निर्माण होत असल्याचा आरोप करण्यात आला आहे.
शहादा हे तालुक्याचे मुख्य ठिकाण असून सुमारे २०० गावांतील नागरिक दररोज बाजारपेठेसाठी शहरात येत असतात. मात्र खराब रस्त्यांमुळे व्यापारी आणि ग्राहकांना मोठ्या अडचणींचा सामना करावा लागत असून, स्थानिक व्यापारावरही विपरीत परिणाम होत असल्याचे निवेदनात म्हटले आहे.
“शहरातील एखादा-दुसरा रस्ता वगळता बहुतांश रस्त्यांची अवस्था गंभीर आहे. पावसाळ्यात खड्ड्यांमध्ये पाणी साचल्यास मोठी जीवितहानी होण्याची शक्यता नाकारता येत नाही. तरीही पालिका प्रशासन आणि पदाधिकारी या गंभीर समस्येकडे दुर्लक्ष करत आहेत,” असा आरोप शिवसेनेने केला आहे.
पालिका प्रशासनाने तात्काळ दखल घेऊन पावसाळ्यापूर्वी सर्व रस्त्यांची दुरुस्ती करावी, अन्यथा शिवसेनेच्या वतीने तीव्र स्वरूपाचे आंदोलन करण्यात येईल, असा इशाराही निवेदनातून देण्यात आला आहे. तसेच आंदोलनादरम्यान कायदा व सुव्यवस्थेचा प्रश्न निर्माण झाल्यास त्यास पालिका प्रशासन जबाबदार राहील, असेही स्पष्ट करण्यात आले आहे.
या निवेदनावर तालुकाप्रमुख मनलेश जायसवाल यांच्यासह शिवसेना ज्येष्ठ नेते राजेंद्र पेंढारकर, जयसिंग ठाकरे, गोपाल कोळी, हितेंद्र वर्मा, जगदीश पाटील, ॲड. लव लोहार, अंकुश लोहार आणि महेश पवार यांच्या स्वाक्षऱ्या आहेत. निवेदनाच्या प्रती विधान परिषद आमदार चंद्रकांत रघुवंशी, जिल्हाधिकारी नंदुरबार, नगराध्यक्ष अभिजित पाटील, उपनगराध्यक्ष माधवीताई पाटील, प्रांताधिकारी, तहसीलदार आणि पोलीस निरीक्षक यांना पाठविण्यात आल्या आहेत.
