शहादा, दि. २१ :
नंदुरबार जिल्हा भारतीय राष्ट्रीय काँग्रेसच्या जिल्हाध्यक्षपदी शहादा येथील ‘पटेल रेसिडेन्सी ग्रुप’चे प्रमुख आणि ज्येष्ठ नेते दीपकभाई रमणलाल पटेल यांची नियुक्ती करण्यात आली आहे. गेल्या अनेक वर्षांपासून रिक्त असलेल्या जिल्हाध्यक्षपदावर अखेर नियुक्ती जाहीर झाल्याने जिल्हा काँग्रेसला नवे नेतृत्व मिळाले असून, पक्ष कार्यकर्त्यांमध्ये उत्साहाचे वातावरण निर्माण झाले आहे.
आगामी स्थानिक स्वराज्य संस्था व विविध निवडणुकांच्या पार्श्वभूमीवर काँग्रेस पक्षाने राज्यभर संघटनात्मक फेरबांधणी सुरू केली आहे. त्याचाच एक भाग म्हणून काँग्रेसच्या केंद्रीय निरीक्षकांनी नुकताच नंदुरबार जिल्ह्याचा दौरा करून स्थानिक पदाधिकारी, कार्यकर्ते आणि जनतेच्या भावना जाणून घेतल्या होत्या.
या महत्त्वाच्या पदासाठी जिल्ह्यातील सुमारे २० हून अधिक इच्छुकांनी दावेदारी केली होती. मात्र पक्षातील ज्येष्ठता, प्रदीर्घ राजकीय अनुभव, जनसंपर्क आणि पक्षनिष्ठा या निकषांवर पक्षश्रेष्ठींनी दीपकभाई पटेल यांच्या नावावर अंतिम शिक्कामोर्तब केले.
दीपकभाई पटेल यांनी यापूर्वी शहादा नगरपालिकेचे उपनगराध्यक्ष म्हणून काम पाहिले असून, त्यांच्या कार्यकाळात विविध विकासकामांमुळे त्यांनी वेगळी ओळख निर्माण केली आहे. राजकीय, सामाजिक, व्यावसायिक तसेच तळागाळातील कार्यकर्त्यांशी त्यांचा थेट संपर्क आणि सलोख्याचे संबंध असल्याने आगामी काळात जिल्ह्यात काँग्रेस संघटना अधिक बळकट होईल, असा विश्वास व्यक्त केला जात आहे.
त्यांच्या नियुक्तीबद्दल जिल्हाभरातून विविध राजकीय, सामाजिक आणि व्यावसायिक क्षेत्रातील मान्यवरांकडून अभिनंदनाचा वर्षाव होत असून, सोशल मीडियावरही शुभेच्छांचा ओघ सुरू आहे.
