शहादा, दि. 21 (प्रतिनिधी) :
भारतीय जनता पार्टी, नंदुरबार जिल्ह्याच्या वतीने आयोजित पंडित दीनदयाल उपाध्याय प्रशिक्षण महाभियान अंतर्गत शहादा येथे घेण्यात आलेली दोन दिवसीय निवासी कार्यकर्ता प्रशिक्षण कार्यशाळा उत्साहात संपन्न झाली.
आगामी काळातील संघटनात्मक बांधणी आणि कार्यकर्त्यांच्या वैचारिक जडणघडणीच्या दृष्टीने ही कार्यशाळा अत्यंत महत्त्वाची मानली जात आहे.
कार्यशाळेचे उद्घाटन भाजपचे नंदुरबार जिल्हा प्रभारी बबनराव चौधरी यांच्या हस्ते दीपप्रज्वलन करून तसेच भारतमाता, पंडित दीनदयाल उपाध्याय आणि स्वातंत्र्यवीर सावरकर यांच्या प्रतिमांचे पूजन करून करण्यात आले. कार्यक्रमाच्या अध्यक्षस्थानी भाजपचे जिल्हाध्यक्ष निलेश माळी होते.
या दोन दिवसीय निवासी प्रशिक्षण शिबिराला जिल्ह्यातील भाजपचे वरिष्ठ नेते, पदाधिकारी आणि कार्यकर्त्यांनी मोठ्या संख्येने उपस्थिती लावली. यामध्ये आमदार राजेश पाडवी, माजी खासदार डॉ. हिनाताई गावित, प्रदेश सदस्य डॉ. शशिकांत वाणी, प्रा. पंकज पाठक, शहादा नगरपालिका उपनगराध्यक्षा सौ. माधवीताई मकरंद पाटील, भाजप जिल्हा महामंत्री सदानंद रघुवंशी, कैलास चौधरी, डॉ. सत्यानंद गावित, जिल्हा उपाध्यक्ष जयपालसिंह रावल यांच्यासह विविध आघाड्यांचे प्रमुख, तालुकाध्यक्ष, शहराध्यक्ष आणि कार्यकर्त्यांचा समावेश होता.
पंडित दीनदयाल उपाध्याय यांच्या अंत्योदय विचारांवर आधारित पक्षाची ध्येयधोरणे तळागाळातील कार्यकर्त्यांपर्यंत पोहोचवणे आणि संघटनात्मक कौशल्ये विकसित करणे हा या निवासी कार्यशाळेचा मुख्य उद्देश होता.
कार्यशाळेदरम्यान पक्षाचा इतिहास, सध्याची राजकीय परिस्थिती, केंद्र व राज्य शासनाच्या लोककल्याणकारी योजना, सोशल मीडियाचा प्रभावी वापर तसेच संघटनात्मक बळकटी यांसारख्या विविध विषयांवर तज्ज्ञ वक्त्यांनी मार्गदर्शन केले.
पहिल्या दिवसापासूनच कार्यकर्त्यांमध्ये मोठा उत्साह दिसून आला. शहादा शहरातील व्हीएसएस लॉन्स येथे निवासी शिबिरासाठी उत्तम नियोजन व व्यवस्था करण्यात आली होती. हे प्रशिक्षण शिबिर यशस्वी करण्यासाठी शहर व तालुका भाजप पदाधिकारी आणि कार्यकर्त्यांनी विशेष परिश्रम घेतले.
