प्रतिनिधी :
बीड : बीड जिल्ह्यात तब्बल साडेतीन वर्षे अप्पर पोलीस अधीक्षक म्हणून कार्यरत असलेले सचिन पांडकर यांची नुकतीच धाराशिव येथे बदली झाली होती. त्यांच्या रिक्त झालेल्या पदावर आता राज्य नियंत्रण कक्षातून समीर शेख यांची नियुक्ती करण्यात आली आहे.
बीड जिल्ह्यातील आपल्या कार्यकाळात सचिन पांडकर यांनी अनेक संवेदनशील आणि गंभीर प्रकरणांमध्ये ठोस भूमिका घेत पोलीस प्रशासनाचा धाक कायम ठेवण्याचा प्रयत्न केला. बीडमधील जाळपोळ प्रकरणे, जातीय तणाव तसेच संतोष देशमुख हत्या प्रकरणासारख्या घटनांमध्ये त्यांनी प्रभावीपणे काम करत कायदा व सुव्यवस्था राखण्यास प्राधान्य दिले होते.
पोलीस दलातील एक आश्वासक आणि अभ्यासू अधिकारी म्हणूनही त्यांच्याकडे पाहिले जात होते. बीड जिल्ह्याच्या इतिहासात पहिल्यांदाच एखाद्या अप्पर पोलीस अधीक्षकाला सलग साडेतीन वर्षे काम करण्याची संधी मिळाली होती.
दरम्यान, त्यांच्या बदलीनंतर बीड जिल्ह्यात नव्या अप्पर पोलीस अधीक्षकपदी कोणाची नियुक्ती होणार याबाबत विविध स्तरांवर चर्चा सुरू होती. अखेर समीर शेख यांच्या नियुक्तीवर शिक्कामोर्तब झाले असून, आता त्यांच्या कामकाजाकडे जिल्हावासियांचे लक्ष लागले आहे.
