ग्रामीण भागातील मुली शिक्षणाच्या जोरावर जागतिक स्तरावर आपली ओळख निर्माण करत असल्याचे प्रेरणादायी उदाहरण बुलढाणा जिल्ह्यातील मोताळा तालुक्यातील किन्होळा गावातील कु. प्रतिक्षा किन्होळकर हिने घालून दिले आहे. प्रसिद्ध साहित्यिक तथा कादंबरीकार सुभाष किन्होळकर यांची कन्या असलेल्या प्रतिक्षाने अमेरिकेतील टेक्सॉस-डलास येथील नामांकित विद्यापीठातून एम.एस. (मास्टर ऑफ सायन्स इन सायबर सेक्युरिटी) ही पदवी उत्कृष्ट गुणांनी संपादन केली आहे.
१९ मे रोजी टेक्सॉस युनिव्हर्सिटी, डलास (अमेरिका) येथे झालेल्या पदवीप्रदान समारंभात मान्यवरांच्या हस्ते तिला पदवी बहाल करण्यात आली. तिच्या या यशामुळे बुलढाणा जिल्ह्याच्या शिरपेचात मानाचा तुरा खोवला गेला आहे.
प्रतिक्षा किन्होळकर हिचे बालपण अत्यंत सामान्य शेतकरी कुटुंबात गेले. घरची आर्थिक परिस्थिती हलाखीची असतानाही तिच्या आई-वडिलांनी मुलीच्या शिक्षणाला सर्वोच्च प्राधान्य दिले. तिच्यातील जिद्द आणि मेहनतीच्या जोरावर प्रतिक्षाने सातासमुद्रापार यशाची पताका फडकावली आहे.
तिचे प्राथमिक शिक्षण बुलढाण्यातील महात्मा ज्योतिबा फुले प्राथमिक शाळेत, तर माध्यमिक शिक्षण भारत विद्यालयात झाले. त्यानंतर पुणे येथील शासकीय तंत्रनिकेतन महाविद्यालयातून तिने पॉलिटेक्निक (कॉम्प्युटर) शिक्षण पूर्ण केले. पुढे ज्ञानबा मोझे कॉलेजमधून बी.ई. (कॉम्प्युटर) पदवी संपादन केली.
शिक्षणानंतर तिने दोन वर्षे कॅपजेमिनी कंपनीत सहायक अभियंता म्हणून काम केले. मात्र उच्च शिक्षणाची जिद्द कायम ठेवत तिने अमेरिकेतील टेक्सॉस-डलास विद्यापीठात प्रवेश मिळवला आणि एम.एस. पदवी यशस्वीरीत्या पूर्ण केली.
प्रतिक्षाच्या या यशामागे तिचे आई-वडील तसेच भागवत इंगोले, कविधा इंगोले, नितीन इंगोले, कविता इंगोले, अभयसिंग थोरात, मुकुंद वैराळकर, प्रफुल्ल गार्वे, प्रीती थोरात, सौरभ किन्होळकर आणि प्रतीक गवळी यांचे मोलाचे मार्गदर्शन लाभले.
ग्रामीण भागातील विद्यार्थ्यांसाठी प्रतिक्षा किन्होळकर हिची यशोगाथा प्रेरणादायी ठरत असून तिच्यावर विविध स्तरांतून अभिनंदनाचा वर्षाव होत आहे.
