कन्नड | प्रतिनिधी
आगामी निवडणुकांच्या पार्श्वभूमीवर कन्नड-सोयगाव विधानसभा मतदारसंघातील शिवसेनेची अत्यंत महत्त्वाची “विधानसभा निहाय बैठक” कन्नड येथे उत्साहपूर्ण वातावरणात पार पडली. या बैठकीत पक्ष संघटन अधिक मजबूत करणे, प्रलंबित विकासकामांना गती देणे आणि आगामी निवडणुकांसाठी रणनीती निश्चित करण्यावर सविस्तर चर्चा करण्यात आली.
या बैठकीला शिवसेनेचे ज्येष्ठ नेते व उद्योगमंत्री उदय सामंत यांचे प्रमुख मार्गदर्शन लाभले. तसेच जिल्ह्याचे पालकमंत्री संजय शिरसाट आणि खासदार संदीपान भुमरे यांची प्रमुख उपस्थिती होती.
बैठकीत बोलताना उदय सामंत यांनी बूथ पातळीवर संघटन मजबूत करण्यावर भर देत प्रत्येक शिवसैनिकाने गावागावात जाऊन शासनाच्या लोककल्याणकारी योजना सर्वसामान्य नागरिकांपर्यंत पोहोचवाव्यात, असे आवाहन केले. “जनतेशी थेट संवाद आणि कार्यकर्त्यांची एकजूट हीच पक्षाची खरी ताकद आहे,” असे ते म्हणाले.
संजय शिरसाट यांनी मतदारसंघातील विविध विकासकामांचा आढावा घेत प्रलंबित प्रश्न तातडीने मार्गी लावण्यासाठी शासनस्तरावर प्रयत्न केले जातील, असे आश्वासन दिले. खासदार संदीपान भुमरे यांनी आगामी राजकीय आव्हानांचा उल्लेख करत सर्व कार्यकर्त्यांनी सज्ज राहून पक्ष संघटना अधिक सक्षम करण्याचे आवाहन केले.
या बैठकीला कन्नड आणि सोयगाव तालुक्यातील शिवसेनेचे पदाधिकारी, स्थानिक लोकप्रतिनिधी, माजी पदाधिकारी, महिला आघाडी, युवासेना तसेच विविध अंगीकृत संघटनांचे कार्यकर्ते मोठ्या संख्येने उपस्थित होते. कार्यकर्त्यांच्या घोषणाबाजीने परिसर दणाणून गेला होता.
बैठकीमुळे आगामी निवडणुकांच्या पार्श्वभूमीवर कन्नड-सोयगाव मतदारसंघात शिवसेनेने संघटनात्मक हालचालींना वेग दिल्याचे स्पष्ट दिसून आले.
