दिवा : प्रतिनिधी
दिवा शहरासाठी आनंदाची बातमी समोर आली असून, शहराला अखेर स्वतंत्र नवीन पिनकोड प्राप्त झाला आहे. भारतीय जनता पार्टीचे दिवा येथील पदाधिकारी तसेच “आता तरी जागा हो दिवेकर” संघटनेचे विजय भोईर यांनी केलेल्या सातत्यपूर्ण पाठपुराव्याला अखेर यश मिळाले आहे.
यापूर्वी दिवा आणि मुंब्रा या दोन्ही शहरांसाठी ४००६१२ हा एकच पिनकोड वापरला जात होता. त्यामुळे नागरिकांना विविध प्रशासकीय, तांत्रिक आणि दस्तऐवज वितरणासंदर्भातील अडचणींचा सामना करावा लागत होता. अनेकदा महत्त्वाच्या कामांसाठी दिवेकरांना मुंब्र्यात जावे लागत असल्याची तक्रार होती.
या समस्येवर कायमस्वरूपी तोडगा निघावा आणि दिवा शहराला स्वतंत्र ओळख मिळावी यासाठी विजय भोईर यांनी गेल्या अनेक वर्षांपासून सातत्याने केंद्र शासनाकडे पाठपुरावा केला होता.
अखेर केंद्र सरकारकडून दिवा शहरासाठी स्वतंत्र ४००६११ हा नवीन पिनकोड मंजूर करण्यात आला आहे. या निर्णयामुळे शहरातील नागरिकांमध्ये समाधानाचे वातावरण असून सोशल मीडियावर विजय भोईर यांचे अभिनंदन आणि कौतुक केले जात आहे.
