गुरुवर्य, राजकीय-सामाजिक क्षेत्रातील मान्यवरांसह भक्तांची मोठी उपस्थिती
हदगाव : प्रतिनिधी
हदगाव शहरातील महादेव मंदिराचे गुरुवर्य शिवचैतन्य शिवाचार्य महाराज यांच्या मार्गदर्शनाखाली अधिक मासानिमित्त आयोजित पट्टाभिषेक वर्धापन दिन सोहळा भक्तिमय वातावरणात संपन्न झाला. १९ मे ते २१ मे दरम्यान विविध धार्मिक कार्यक्रमांचे आयोजन करण्यात आले होते.
या सोहळ्यानिमित्त दररोज सकाळी श्री शिवयोगी बसवलिंग महास्वामीजी यांच्या संजीवन समाधीस रुद्राभिषेक, शिवपाठ आणि विश्वशांती रुद्रयाग स्वाहाकार पार पडला. त्यानंतर महादेव मंदिर ते कस्तुरी मंगल कार्यालय अशी रुद्रकलश मिरवणूक काढण्यात आली. पुढे ग्रंथराज परमरहस्य पारायण व महाप्रसादाचे आयोजन करण्यात आले.
२१ मे रोजी उज्जैन येथील श्रीमद जगदगुरु श्री श्री श्री सिद्धलिंगराजदेशिकेंद्र शिवाचार्य महास्वामीजी यांचे हत्तीवरून जल्लोषात स्वागत करण्यात आले. यावेळी विविध जिल्ह्यांतील संत-महंत, गुरुवर्य आणि धार्मिक क्षेत्रातील मान्यवर उपस्थित होते.
धर्मसभेत उपस्थित गुरुवर्यांनी आपले विचार व्यक्त करत शिवचैतन्य शिवाचार्य महाराज यांच्या कार्याचे कौतुक केले. यावेळी आमदार बाबुराव कदम कोहळीकर यांनी महादेव मंदिराला तीर्थक्षेत्राचा दर्जा मिळवून देण्यासाठी तसेच सभागृह व मंगल कार्यालयासाठी निधी उपलब्ध करून देण्याचे आश्वासन दिले.
या सोहळ्यास माजी महापौर शैलेजा किशोर स्वामी, आमदार किशनराव बानखेडे, नगराध्यक्षा रोहिणीताई वानखेडे, निधीताई भुतडा, कृष्णा पाटील आष्टीकर यांच्यासह राजकीय, सामाजिक आणि धार्मिक क्षेत्रातील अनेक मान्यवर उपस्थित होते.
सोहळ्याच्या यशस्वी आयोजनासाठी हदगाव परिसरातील भक्त, सेवेकरी आणि ग्रामस्थांनी विशेष परिश्रम घेतले. कार्यक्रमाचे प्रास्ताविक शिवचैतन्य शिवाचार्य महाराज यांनी केले. सूत्रसंचालन संदेश चोंढेकर व प्रा. डॉ. साईनाथ चंदापुरे यांनी केले, तर आभार योगीराज महाराज यांनी मानले.
