औंढा नागनाथ : प्रतिनिधी
येहळेगाव सोळंके येथे छत्रपती शिवाजी महाराज महसूल समाधान शिबिर उत्साहात पार पडले. या विशेष शिबिराच्या अध्यक्षस्थानी तहसीलदार हरीश गाडे उपस्थित होते, तर नायब तहसीलदार अनिता कोलगने यांची प्रमुख उपस्थिती लाभली.
या शिबिराच्या माध्यमातून औंढा नागनाथ तालुक्यातील येहळेगाव सोळंके मंडळातील नागरिकांना महसूल तसेच विविध शासकीय विभागांच्या सेवा व योजनांचा लाभ एकाच ठिकाणी उपलब्ध करून देण्यात आला.
शिबिरात शिधापत्रिका, उत्पन्न प्रमाणपत्र, जात प्रमाणपत्र यांचे वितरण करण्यात आले. तसेच जिवंत ७/१२ नोंदी, ७/१२ वरील शिवरस्ते नोंदी आदी महसुली कामकाजासंदर्भातील सुमारे २८० प्रमाणपत्रांचे वितरण करण्यात आले.
याशिवाय संजय गांधी निराधार योजना, श्रावणबाळ सेवा राज्य निवृत्ती वेतन योजना, इंदिरा गांधी राष्ट्रीय वृद्धापकाळ योजना, आरोग्य विभाग, कृषी विभाग आणि पंचायत समितीच्या विविध योजनांची माहिती नागरिकांना देण्यात आली. पात्र लाभार्थ्यांना योजनांचा प्रत्यक्ष लाभही प्रदान करण्यात आला.
यावेळी तहसीलदार हरीश गाडे यांनी नागरिकांना शासनाच्या विविध योजनांचा लाभ घेण्याचे आवाहन केले. तसेच शासनाच्या लोकाभिमुख उपक्रमांविषयी मार्गदर्शन केले.
या शिबिरास दुय्यम निबंधक मुरुटकर, पुरवठा निरीक्षक कल्याणी हटवार, कृषी अधिकारी शिवप्रसाद संगेकर, मंडळ अधिकारी एस. एन. गायकवाड, ग्राम महसूल अधिकारी एस. पी. कापसे, पुष्पलता जायभाये, डी. ए. पौळ, विमल टेकम, एन. एन. ठाकरे यांच्यासह विविध विभागांचे अधिकारी, कर्मचारी आणि मोठ्या संख्येने नागरिक उपस्थित होते.
शिबिराच्या माध्यमातून विविध शासकीय सेवा थेट नागरिकांपर्यंत पोहोचल्याने उपस्थित नागरिकांनी समाधान व्यक्त केले.
