मानवत : प्रतिनिधी
“भरतमुनी आणि तत्कालीन महापुरुषांनी निर्माण केलेले नाट्यशास्त्र अत्यंत समृद्ध असून, ज्या वैज्ञानिक पद्धतीने भारतीय नाट्यशास्त्राची रचना करण्यात आली आहे, तसे जगातील कोणत्याही देशात आढळून येत नाही,” असे प्रतिपादन नाट्यशास्त्राच्या अभ्यासक तथा के. के. एम. महाविद्यालयाच्या माजी विद्यार्थिनी डॉ. योगिता महाजन तळेकर यांनी केले.
येथील के. के. एम. महाविद्यालयात आयोजित सत्कार समारंभात त्या बोलत होत्या. यावेळी पाथरी तालुका शिक्षण प्रसारक मंडळाचे सहसचिव विजयकुमार दलाल, संचालक दिलीपराव हिबारे आणि ज्येष्ठ विधिज्ञ ॲड. बालासाहेब तळेकर यांची प्रमुख उपस्थिती होती.
कार्यक्रमास प्राचार्य डॉ. भास्कर मुंडे, प्रा. शिवराज नाईक, पर्यवेक्षक प्रा. अनिल कापसे, मुख्याध्यापक पी. एम. कजेवाड तसेच प्रा. शांतिलिंग काळे उपस्थित होते.
प्रा. शिवराज नाईक यांनी डॉ. योगिता महाजन यांच्या कार्याचा परिचय करून देताना सांगितले की, महाविद्यालयात शिक्षण घेत असतानाच त्यांना नाट्यशास्त्राची आवड निर्माण झाली. ज्येष्ठ अभिनेते Laxman Deshpande यांच्या मार्गदर्शनाखाली त्यांनी नाट्यशास्त्राचे शिक्षण घेतले. त्यानंतर त्यांनी पीएचडी पदवी संपादन केली. नुकतेच लंडन येथे आयोजित जागतिक परिषदेत त्यांनी भारताचे प्रतिनिधित्व करत भारतीय रंगभूमीवर सादरीकरण केले. या परिषदेत जगातील ६८ देशांतील प्रतिनिधी सहभागी झाले होते.
प्राचार्य डॉ. भास्कर मुंडे यांनी मनोगतात सांगितले की, “महाविद्यालयाच्या माजी विद्यार्थिनीने जागतिक स्तरावर आपल्या कार्याचा ठसा उमटवणे ही संस्थेसाठी अभिमानाची बाब आहे.”
कार्यक्रमाचे सूत्रसंचालन प्रसाद जोशी यांनी केले.
