जुन्नर : लोककलावंतांच्या विविध प्रलंबित मागण्या व न्याय हक्कासाठी जुन्नर तहसील कार्यालय आणि पंचायत समिती कार्यालयावर “लोककलावंत सांस्कृतिक विचार मंच महाराष्ट्र राज्य”च्या वतीने भव्य गजर आंदोलन करण्यात आले. या आंदोलनात महिला व ग्रामीण भागातील लोककलावंत मोठ्या संख्येने सहभागी झाले होते.
राजर्षी शाहू महाराज ज्येष्ठ साहित्यिक व कलावंत मानधन सन्मान योजनेअंतर्गत २०२४ चे प्रस्ताव सांस्कृतिक कार्य संचालनालयाकडून जिल्ह्यांना पाठविण्यात आले असतानाही पुणे जिल्ह्यात अद्याप कोणतीही अंमलबजावणी झालेली नाही. इतर जिल्ह्यांमध्ये मानधन सुरू होऊन चार ते पाच महिने उलटले असताना पुणे जिल्ह्यातील ग्रामीण कलावंतांना मानधनापासून वंचित ठेवण्यात येत असल्याचा आरोप आंदोलनकर्त्यांनी केला.
यावेळी तहसीलदार आणि गटविकास अधिकारी यांना निवेदन देण्यात आले. अधिकाऱ्यांनी लवकरच प्रलंबित त्रुटी दूर करून लोककलावंतांचे मानधन सुरू करण्याचे आश्वासन दिले. मात्र, मागण्या तातडीने मान्य न झाल्यास जिल्हाधिकारी कार्यालयावर १०१ ताशा-ढोलांसह “काम बंद महागजर आंदोलन” छेडण्यात येईल, असा इशारा संघटनेचे संस्थापक अध्यक्ष गवनेरजी सरोदे यांनी दिला.
या आंदोलनात अन्याय अत्याचार विरोधी युवा व महिला संघटना महाराष्ट्र राज्यचे निवड समिती अध्यक्ष अनिल सोनवणे हे शहापूर येथून हजारो महिलांसह सहभागी झाले होते. आंदोलन यशस्वी करण्यासाठी बाबुलाल शेख, बाळासाहेब शिरतार, संजय महाडिक, अक्षय अल्हाड, तोफिक इनामदार, सुनील बर्वे, सुनील थोरात, बन्सी त्रिभुवन, किशोर आडांगळे, नारायण पथवे, अर्जुन धिंदळे आदींसह अनेक कलावंत व कार्यकर्त्यांनी विशेष परिश्रम घेतले.
अकोले तालुक्यातील अनेक लोककलावंतांनी पारंपरिक कला सादर करत आंदोलनाला वेगळे स्वरूप दिले. भीमराव पवार यांच्या “गणपती” कलाकृतीचे सादरीकरण झाले, तर स्वप्निल गायकवाड यांनी जागरण-गोंधळ सादर करून कलावंतांची व्यथा मांडली. खेमा पथवे, खंडू गांगड आणि विविध वाजंत्री मंडळांनीही कला सादरीकरण करत आंदोलनात सहभाग घेतला.
शिरपुंजे येथील महिला लेझीम पथक, भोजमाता महिला लेझीम पथक तसेच शहापूर-भिवंडी येथील टाळ पथक आणि भजनी मंडळांनी भर उन्हातही उत्साहाने सहभाग नोंदवला. महिला जिल्हाध्यक्ष विमलताई डोंगरे यांनी महिला कलावंतांना संघटित करून आंदोलनात सक्रिय भूमिका बजावली. निर्मलाताई सरोदे यांचेही विशेष योगदान लाभले.
तसेच दत्ता महाडिक पुणेकर तमाशा मंडळाचे मालक संजय महाडिक यांचे विशेष सहकार्य लाभले. सुमारे अडीच हजार लोककलावंतांच्या उपस्थितीत हे आंदोलन उत्स्फूर्त वातावरणात पार पडले. आंदोलनासाठी आलेल्या सर्व कलावंतांसाठी भोजन व्यवस्था करण्यात आली.
पत्रकार संदीप शितोळे यांनी लोककलावंतांच्या समस्या विविध माध्यमांतून मांडल्याबद्दल आयोजकांनी त्यांचे आभार मानले.
