शहादा, दि. २२ : माधवीताई मकरंद पाटील या सध्या चांगल्याच ॲक्शन मोडमध्ये दिसून येत असून नगरपालिकेच्या प्रशासकीय कामकाजात शिस्त आणण्यासाठी त्यांनी आज अचानक नगरपालिका कार्यालयाला भेट देत कर्मचाऱ्यांच्या उपस्थितीची पाहणी केली. या अचानक तपासणीमुळे उशिरा येणाऱ्या कर्मचाऱ्यांमध्ये एकच खळबळ उडाली.
सकाळी कार्यालयीन वेळ सुरू होताच उपनगराध्यक्षा माधवीताई पाटील यांनी थेट पालिकेच्या प्रवेशद्वारावर हजेरी लावत कर्मचाऱ्यांची उपस्थिती नोंदवही (मस्टर) तपासली. यावेळी अनेक विभागांतील कर्मचारी वेळेनंतरही कार्यालयात पोहोचले नसल्याचे समोर आले. काही कर्मचाऱ्यांनी उशिराबाबत विविध कारणे सांगण्याचा प्रयत्न केला; मात्र उपनगराध्यक्षांनी त्यांची कडक शब्दांत कानउघाडणी केली.
यावेळी बोलताना माधवीताई मकरंद पाटील म्हणाल्या, “सर्वसामान्य नागरिकांची कामे वेळेत आणि पारदर्शक पद्धतीने होणे हा आमचा मुख्य उद्देश आहे. यासाठी अधिकारी आणि कर्मचाऱ्यांनी वेळेचे काटेकोर पालन करणे आवश्यक आहे. नागरिकांना ताटकळत ठेवणाऱ्यांची कोणतीही गय केली जाणार नाही.”
या धडक तपासणीनंतर वारंवार उशिरा येणारे किंवा विनापरवानगी गैरहजर राहणाऱ्या कर्मचाऱ्यांची यादी तयार करण्यात येत असून त्यांच्यावर प्रशासनाकडून कारवाई होण्याची शक्यता व्यक्त होत आहे.
नगरपालिकेचे कामकाज अधिक शिस्तबद्ध, गतिमान आणि नागरिकाभिमुख करण्यासाठी उपनगराध्यक्षांनी उचललेल्या या पावलाचे शहरातून स्वागत होत आहे. तसेच भविष्यातही अशा अचानक तपासण्या सुरू राहणार असल्याचे प्रशासकीय सूत्रांकडून सांगण्यात येत आहे.
