जुन्नर | प्रतिनिधी
लोककलावंतांच्या न्याय हक्कांसाठी आणि प्रलंबित मागण्यांच्या पूर्ततेसाठी जुन्नर तहसील कार्यालय व पंचायत समिती कार्यालयावर भव्य गजर आंदोलन करण्यात आले. भव्य लोककलावंत सांस्कृतिक विचार मंच महाराष्ट्र राज्यच्या वतीने आयोजित या आंदोलनात महिला व ग्रामीण भागातील लोककलावंत मोठ्या संख्येने सहभागी झाले होते.
राजश्री शाहू महाराज ज्येष्ठ साहित्यिक व कलावंत मानधन सन्मान योजनेअंतर्गत २०२४ चे प्रस्ताव सांस्कृतिक कार्य संचालनालयाकडून विविध जिल्ह्यांना पाठविण्यात आले असले, तरी पुणे जिल्ह्यात अद्याप अंमलबजावणी झालेली नसल्याचा आरोप आंदोलनकर्त्यांनी केला. इतर जिल्ह्यांमध्ये चार ते पाच महिन्यांपासून मानधन सुरू झाले असताना पुणे जिल्ह्यातील ग्रामीण लोककलावंतांना मानधनापासून वंचित ठेवले जात असल्याची खंत यावेळी व्यक्त करण्यात आली.
या मागण्यांसंदर्भात तहसीलदार व गटविकास अधिकाऱ्यांना निवेदन देण्यात आले. संबंधित अधिकाऱ्यांनी यापूर्वी झालेल्या त्रुटी दूर करून तातडीने मानधन प्रक्रिया सुरू करण्याचे आश्वासन दिल्याचे आंदोलनकर्त्यांनी सांगितले.
संघटनेचे संस्थापक अध्यक्ष गवनेरजी सरोदे यांनी इशारा देताना सांगितले की, “जर लोककलावंतांचे मानधन तातडीने सुरू झाले नाही, तर जिल्हाधिकारी कार्यालयावर १०१ ताशा-ढोलांसह काम बंद ‘महागजर आंदोलन’ छेडण्यात येईल.”
या आंदोलनात अन्याय अत्याचार विरोधी युवा व महिला संघटना महाराष्ट्र राज्यचे निवड समिती अध्यक्ष अनिल सोनवणे हे शहापूर येथून हजारो महिलांसह सहभागी झाले होते. तसेच बाबुलाल भाई शेख, बाळासाहेब शिरतार, संजय महाडिक, अक्षय अल्हाड, तोफिक इनामदार, सुनील बर्वे, सुनील थोरात, बन्सी त्रिभुवन, किशोर आडांगळे, नारायण पथवे, अर्जुन धिंदळे यांच्यासह अनेक कलावंत व पदाधिकारी उपस्थित होते.
मोर्चादरम्यान विविध लोककला सादरीकरणांनी आंदोलनाला वेगळीच रंगत आणली. भीमराव पवार व मानेरे यांची गणपती कलाकृती, स्वप्निल गायकवाड यांचे जागरण-गोंधळ सादरीकरण, तसेच खेमा पथवे आणि खंडू गांगड यांच्या कलाप्रस्तुतींना उपस्थितांनी उत्स्फूर्त प्रतिसाद दिला. शिरपुंजे येथील महिला लेझीम पथक, भोजमाता महिला लेझीम पथक तसेच शहापूर-भिवंडी येथील टाळ पथक आणि भजनी मंडळांनीही आपली कला सादर करत शासनाचे लक्ष वेधले.
लोककलावंत सांस्कृतिक विचार मंच महाराष्ट्र राज्यच्या महिला जिल्हाध्यक्ष विमलताई डोंगरे यांनी महिला कलावंतांना संघटित करून मोर्चात सक्रिय सहभाग नोंदवला. निर्मलाताई सरोदे यांचेही विशेष योगदान लाभले.
या मोर्चासाठी दत्ता महाडिक पुणेकर तमाशा मंडळाचे मालक संजय महाडिक यांचे विशेष सहकार्य लाभले. सुमारे अडीच हजार लोककलावंतांच्या उपस्थितीत आंदोलन उत्साहात पार पडले. मोर्चासाठी आलेल्या सर्व कलावंतांसाठी भोजन व्यवस्थाही करण्यात आली.
