वर्धा | प्रतिनिधी :
नागपूरहून नांदेडकडे जाणाऱ्या राज्य परिवहन महामंडळाच्या बसचा वर्धा-नागपूर मार्गावर भीषण अपघात झाला. रस्त्यावर अचानक रोड रोलर आडवा आल्याने चालकाचे बसवरील नियंत्रण सुटले आणि बस थेट रस्त्यालगतच्या शेतात जाऊन धडकली.
या अपघातात बसमधील काही प्रवासी तसेच एका दुचाकीस्वाराला दुखापत झाल्याची माहिती समोर आली आहे. अपघातानंतर परिसरात काही काळ गोंधळाचे वातावरण निर्माण झाले होते.
घटनेची माहिती मिळताच ॲम्बुलन्स तातडीने घटनास्थळी दाखल झाली. जखमींना त्वरित नजीकच्या रुग्णालयात उपचारासाठी हलविण्यात आले. तसेच मदतकार्यासाठी टायगर ग्रुप वर्धा जिल्हा चे सुनील मंगरूळकर, निलेश गोत्रे आणि पवनार येथील ग्रामस्थांनी तातडीने धाव घेत मदतकार्य केले.
सुदैवाने या भीषण अपघातात कोणतीही जीवितहानी झाली नसून जखमींवर उपचार सुरू आहेत. अपघाताचे नेमके कारण आणि पुढील तपास पोलीस प्रशासन करीत आहे.
