मालेगाव तालुका | प्रतिनिधी
नाशिक जिल्ह्यातील मालेगाव तालुक्यातील सोयगाव येथील रहिवासी तसेच 23 मराठा बटालियनमधील सेवा निवृत्त ऑर्डिनरी कैप्टन कैलासवासी जीवराज दशरथ खैरनार यांचे रविवार दिनांक 17 मे 2026 रोजी सकाळी सुमारे 7.01 वाजता राहत्या घरी हृदयविकाराच्या झटक्याने दुःखद निधन झाले. त्यांच्या निधनामुळे माजी सैनिक, मित्रपरिवार तसेच संपूर्ण परिसरात हळहळ व्यक्त करण्यात येत आहे.
जीवराज दशरथ खैरनार यांनी आपल्या सैन्य सेवेमध्ये तब्बल 32 वर्षे देशसेवा बजावत 23 मराठा बटालियनमध्ये ऑर्डिनरी कैप्टन म्हणून अत्यंत प्रामाणिकपणे कार्य केले होते. आपल्या कर्तव्यदक्ष, शिस्तप्रिय आणि सेवाभावी स्वभावामुळे त्यांनी सैन्य दलात तसेच समाजात एक वेगळी ओळख निर्माण केली होती. सैन्य सेवेदरम्यान त्यांनी अनेक जवानांना मार्गदर्शन केले असून देशसेवेसाठी त्यांचे योगदान उल्लेखनीय मानले जाते.
सेवानिवृत्तीनंतरही त्यांनी सामाजिक कार्यात सक्रिय सहभाग घेत परिसरातील युवकांना सैन्य भरतीसाठी प्रेरित केले. त्यांच्या शांत, मनमिळावू आणि मदतीस तत्पर स्वभावामुळे समाजात त्यांना विशेष मानाचे स्थान होते.
त्यांच्या पश्चात पत्नी सौ. निशा जीवराज खैरनार, मुलगा निखिल जीवराज खैरनार, मुलगी मोहिनी अमर पठारे तसेच जावई अमर शिवाजी पठारे असा परिवार आहे. त्यांच्या निधनामुळे खैरनार परिवारावर दुःखाचा डोंगर कोसळला आहे.
त्यांच्या पार्थिवावर सोयगाव येथे शोकाकुल वातावरणात अंत्यसंस्कार करण्यात आले. यावेळी माजी सैनिक, नातेवाईक, मित्रपरिवार तसेच गावातील नागरिक मोठ्या संख्येने उपस्थित होते. अनेकांनी त्यांच्या पार्थिवाचे अंत्यदर्शन घेऊन भावपूर्ण श्रद्धांजली अर्पण केली.
तसेच येत्या दिनांक 26 मे 2026 रोजी सकाळी 9 वाजता मालेगाव तालुक्यातील सोयगाव येथे कैलासवासी जीवराज दशरथ खैरनार यांचा दहावा कार्यक्रम आयोजित करण्यात आला आहे. यावेळी त्यांच्या आत्म्यास शांती लाभावी यासाठी ह.भ.प. गोविंद पवार महाराज यांचे प्रवचन आयोजित करण्यात आले असल्याची माहिती परिवाराकडून देण्यात आली आहे.
