प्रतिनिधी | वर्धा
वर्धा पोलीस अधीक्षक सौरभ कुमार अग्रवाल यांनी अंमली पदार्थ विक्री व साठा करणाऱ्या गुन्हेगारांवर कठोर कारवाई करण्याचे आदेश दिल्यानंतर स्थानिक गुन्हे शाखेने धडक मोहीम सुरू केली आहे. त्याच अनुषंगाने दि. २१ मे २०२६ रोजी करण्यात आलेल्या कारवाईत मेफेड्रॉन (एम.डी. ड्रग्स) विक्री करणाऱ्या आरोपी दाम्पत्याला रंगेहाथ अटक करण्यात आली.
स्थानिक गुन्हे शाखेच्या पथकाला मिळालेल्या गोपनीय माहितीनुसार, पोलीस स्टेशन वर्धा शहर हद्दीतील मॉडेल हायस्कूलजवळील अशोक नगर, तारफैल परिसरात राहणाऱ्या आरोपीच्या घरी एनडीपीएस कायद्यान्वये छापा टाकण्यात आला.
या कारवाईदरम्यान आरोपी
१) शेख रहिम शेख रशीद (वय ४२ वर्ष)
२) शहाणा जाफीर शेख (वय ३६ वर्ष)
हे दोघे संगनमताने मेफेड्रॉन (एम.डी. ड्रग्स) या अंमली पदार्थाची विक्री करताना आढळून आले. तपासादरम्यान आरोपी क्रमांक ३ वसीम अहमद खान पठाण याने सदर अंमली पदार्थाचा पुरवठा केल्याचे निष्पन्न झाले.
पोलिसांनी घटनास्थळी पंचनामा करून आरोपींकडून सुमारे ४ ग्रॅम ५० मिलीग्रॅम मेफेड्रॉन (एम.डी. ड्रग्स) जप्त केले. जप्त करण्यात आलेल्या मुद्देमालाची अंदाजे किंमत १८ हजार रुपये असल्याचे सांगण्यात आले आहे.
या प्रकरणी तिन्ही आरोपींविरुद्ध वर्धा शहर पोलीस स्टेशन येथे एनडीपीएस कायद्यान्वये गुन्हा दाखल करण्यात आला आहे.
ही कारवाई पोलीस अधीक्षक सौरभ कुमार अग्रवाल व अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी, सहाय्यक पोलीस निरीक्षक आशिषसिंग ठाकुर, पोलीस उपनिरीक्षक सलाम कुरेशी तसेच स्थानिक गुन्हे शाखेच्या पथकाने पार पाडली.
