पनवेल | प्रतिनिधी
नवीन पनवेल येथील आदई सर्कल येथे उभारण्यात आलेल्या क्रिकेट थीमविरोधात स्थानिक नागरिक व क्रांतिवीरप्रेमींमध्ये तीव्र नाराजी व्यक्त होत आहे. आदई सर्कलला आद्य क्रांतिवीर वासुदेव बळवंत फडके यांचे नाव देण्यात आलेले असताना त्या ठिकाणी महानगरपालिकेकडून क्रिकेट थीम उभारण्यात आल्याने महापुरुषांचा अवमान होत असल्याची भावना व्यक्त केली जात आहे.
पत्रकार मित्र असोसिएशनचे संस्थापक केवल महाडिक यांनी यासंदर्भात पनवेल महानगरपालिका आयुक्त मंगेश चितळे यांना निवेदन दिले आहे. या निवेदनात येत्या १५ दिवसांच्या आत सदर क्रिकेट थीम हटवून त्या ठिकाणी आद्य क्रांतिवीर वासुदेव बळवंत फडके यांच्या जीवनावर आधारित स्मारक अथवा माहितीपट उभारण्यात यावा, अशी मागणी करण्यात आली आहे. अन्यथा आदई सर्कल येथे पत्रकार मित्र असोसिएशनतर्फे एकदिवसीय लाक्षणिक उपोषण करण्यात येईल, असा इशारा देण्यात आला आहे.
आद्य क्रांतिवीर वासुदेव बळवंत फडके हे भारतीय सशस्त्र क्रांतीचे जनक म्हणून ओळखले जातात. १८५७ च्या स्वातंत्र्य संग्रामानंतर इंग्रजांविरोधात संघटित सशस्त्र लढा उभारणारे ते पहिले मोठे क्रांतिकारक होते. रायगड जिल्ह्यातील शिरढोण येथे जन्मलेल्या फडके यांनी इंग्रजांच्या अन्यायकारक धोरणांविरोधात रामोशी, कोळी, धनगर व इतर समाजघटकांना एकत्र करून स्वराज्यासाठी संघर्ष उभारला. देशाच्या स्वातंत्र्यासाठी त्यांनी संपूर्ण आयुष्य अर्पण केले.
इंग्रज सरकारने त्यांना अटक करून एडनच्या तुरुंगात ठेवले होते. तेथेच १७ फेब्रुवारी १८८३ रोजी त्यांचे निधन झाले. त्यांच्या बलिदानामुळे पुढील अनेक क्रांतिकारकांना प्रेरणा मिळाली.
दरम्यान, आदई सर्कल येथे दिलीप वेंगसकर क्रिकेट अकॅडमीच्या नावाने उभारण्यात आलेली क्रिकेट थीम हटवून त्या ठिकाणी क्रांतिवीरांच्या जीवनकार्यावर आधारित थीम उभारावी, अशी मागणी नागरिकांकडूनही करण्यात येत आहे.
