पुणे | प्रतिनिधी
पिंपरी-चिंचवड शहरासह पुणे परिसरात आज दुपारनंतर जोरदार पावसाने हजेरी लावली. अचानक कोसळलेल्या मुसळधार पावसामुळे नागरिकांची मोठी तारांबळ उडाली. अनेक भागांमध्ये रस्त्यांवर पाणी साचल्याने वाहतुकीचा वेग मंदावला होता, तर काही ठिकाणी वाहतूक कोंडीची परिस्थिती निर्माण झाली.
पावसासोबत विजांचा कडकडाट आणि जोरदार वारेही अनुभवायला मिळाले. काही भागांत झाडांच्या फांद्या तुटून पडल्याच्या घटना घडल्या. सुदैवाने कोणतीही जीवितहानी झाल्याची माहिती समोर आलेली नाही.
पिंपरी-चिंचवड मधील पिंपरी, चिंचवड, आकुर्डी, निगडी तसेच हिंजवडी परिसरात पावसाचा जोर अधिक असल्याचे पाहायला मिळाले. कार्यालयातून घरी परतणाऱ्या नागरिकांची पावसापासून बचावासाठी धावपळ उडाल्याचे चित्र अनेक ठिकाणी दिसून आले.
दरम्यान, अचानक झालेल्या पावसामुळे वातावरणात गारवा निर्माण झाला असून गेल्या काही दिवसांपासून जाणवत असलेल्या उकाड्यापासून नागरिकांना मोठा दिलासा मिळाला आहे.
हवामान विभागाने पुढील काही दिवस पुणे व परिसरात वादळी वाऱ्यासह पावसाची शक्यता वर्तवली असून नागरिकांनी सतर्क राहण्याचे आवाहन करण्यात आले आहे.
