प्रतिनिधी : आष्टी
महाराष्ट्र नवनिर्माण सेना शेतकरी संघटनेचे जिल्हाध्यक्ष कैलास दरेकर यांनी आष्टी विधानसभा मतदारसंघातील बोगस रस्ता कामांच्या मस्टरप्रकरणी गंभीर आरोप करत प्रशासनाकडे तातडीने कारवाईची मागणी केली आहे.
कैलास दरेकर यांनी आरोप केला की, गोरगरीब घरकुल लाभार्थ्यांच्या हक्काचे रोजगार हमी योजनेअंतर्गत मस्टर काढण्याऐवजी कोट्यवधी रुपयांच्या बोगस रस्ता कामांचे मस्टर काढण्याचा प्रयत्न सुरू आहे. पंतप्रधान आवास योजना तसेच राज्य सरकारच्या घरकुल योजनांतील लाभार्थ्यांना स्वतःचे घर बांधण्यासाठी मनरेगा अंतर्गत मजुरी मिळणे आवश्यक असताना प्रशासनाकडून यामध्ये दिरंगाई होत असल्याची तक्रार लाभार्थ्यांकडून करण्यात येत आहे.
दरेकर यांच्या म्हणण्यानुसार, अनेक ठिकाणी प्रत्यक्षात अस्तित्वात नसलेल्या किंवा केवळ कागदोपत्री दाखवलेल्या रस्ता कामांसाठी मस्टर काढले जात आहेत. काही ठिकाणी एकाच मजुराचा फोटो विविध मस्टरवर वापरल्याचा आरोपही करण्यात आला आहे. या प्रकारामुळे शासनाच्या निधीचा गैरवापर होत असून खऱ्या गरजू लाभार्थ्यांना त्यांच्या हक्कापासून वंचित राहावे लागत असल्याचे त्यांनी सांगितले.
आष्टी विधानसभा मतदारसंघातील गोरगरीब घरकुल लाभार्थ्यांचे मस्टर तात्काळ मंजूर करून त्यांना न्याय द्यावा, तसेच कथित बोगस रस्ता कामांची चौकशी करून संबंधितांवर कठोर कारवाई करावी, अशी मागणी कैलास दरेकर यांनी प्रशासनाकडे केली आहे.
