श्रीरामपूरात नीट पेपरफुटी प्रकरणातील आरोपींच्या फोटोंना जोडे मारो आंदोलन

श्रीरामपूर प्रतिनिधी

श्रीरामपूर येथे नीट पेपरफुटी प्रकरणातील आरोपींविरोधात सर्वपक्षीयांच्या वतीने तीव्र निषेध आंदोलन करण्यात आले. आंदोलनादरम्यान आरोपी प्रा. शिवराज मोटेगावकर, प्रा. पी. व्ही. कुलकर्णी, प्रा. मनिषा मांढरे, ब्युटीशन मनिषा वाघमारे, धनंजय लोखंडे, शुभम खैरनार, यश यादव, मांगीलाल बीवाल, दिनेश बीवाल आणि विकास बीवाल यांच्या फोटोंना जोडे मारून निषेध व्यक्त करण्यात आला.

यावेळी Republican Party of India चे जिल्हा कार्याध्यक्ष सुभाष त्रिभुवन म्हणाले की, “नीट पेपरफुटीमुळे लाखो विद्यार्थ्यांचे स्वप्न उद्ध्वस्त झाले आहे. या प्रकरणाच्या धक्क्यामुळे तीन विद्यार्थ्यांनी आत्महत्या केल्याचे समोर आले असून, आरोपींवर कठोर कारवाई करणे आवश्यक आहे.”

Maharashtra Navnirman Sena चे जिल्हाध्यक्ष बाबा शिंदे यांनी आरोपींनी शिक्षकी पेशाला काळिमा फासल्याचा आरोप केला. विद्यार्थ्यांकडून कोट्यवधी रुपये गोळा केल्याची चौकशी करून संबंधितांवर कठोर कारवाई करण्याची मागणी त्यांनी केली.

माजी नगरसेवक राजेंद्र सोनवणे यांनी या प्रकरणाची सखोल चौकशी करण्याची मागणी केली, तर रमादेवी धीवर यांनी विद्यार्थ्यांना न्याय मिळावा यासाठी दोषींवर कठोर कारवाई करण्याची मागणी केली.

यावेळी काँग्रेस सोशल मीडिया सेलचे शहराध्यक्ष रियाज पठाण, माजी नगरसेवक मुन्ना पठाण, शेखर दुबैया, शिवसेनेचे विशाल शिरसाठ, लहुजी सेनेचे हनीफ पठाण तसेच रिपब्लिकन सेनेचे शिवा साठे यांनीही आपली मते व्यक्त केली.

आंदोलनानंतर पोलिस निरीक्षक नितीन देशमुख यांना निवेदन देण्यात आले.