अहिल्यानगर प्रतिनिधी :
मल्हारी दिलीप खुडे यांना राज्यस्तरीय ६ व्या ग्रामीण मराठी साहित्य संमेलनात “संभाजी महाराज समाजरत्न पुरस्कार” प्रदान करून गौरविण्यात आले. निमगांव वाघा येथे आयोजित पुरस्कार वितरण सोहळा व गुणवंत विद्यार्थ्यांच्या गुणगौरव कार्यक्रमात हा सन्मान करण्यात आला. त्यांच्या या गौरवामुळे परिसरात आनंद आणि अभिमानाचे वातावरण निर्माण झाले आहे.
छत्रपती संभाजी महाराज, पुण्यश्लोक अहिल्यादेवी होळकर आणि राष्ट्रसंत तुकडोजी महाराज यांच्या जयंतीनिमित्त आयोजित या कार्यक्रमास विविध क्षेत्रातील मान्यवरांची उपस्थिती लाभली होती. कार्यक्रमाच्या अध्यक्षस्थानी ज्येष्ठ साहित्यिक चंद्रकांत चाबुकस्वार होते.
यावेळी मा. माधवराव लामखडे, ॲड. कृष्णा पंडितराव झावरे, कवयित्री प्रतिभा खैरनार, गणेश वारुळे, रविलाल चौधर, ह.भ.प. सौ. दीपालीताई गणगे तसेच कविवर्य चंद्रकांत पालवे आदी मान्यवर उपस्थित होते.
कार्यक्रमात समाजकारण, युवक संघटन, जनजागृती आणि सर्वसामान्यांच्या प्रश्नांसाठी सातत्याने लढा देणाऱ्या मल्हारी खुडे यांच्या कार्याचा विशेष गौरव करण्यात आला. त्यांच्या नेतृत्वगुणांची आणि सामाजिक बांधिलकीची दखल घेत त्यांना “संभाजी महाराज समाजरत्न पुरस्कार” प्रदान करण्यात आला.
या सोहळ्यात विविध साहित्यिक, कवी, सामाजिक कार्यकर्ते, कलाकार आणि शैक्षणिक क्षेत्रातील मान्यवरांचा सहभाग लाभला. कला व नृत्य क्षेत्रातील रोहिणी थोरात यांनीही उपस्थितांचे विशेष लक्ष वेधले.
कार्यक्रमाचे आयोजन स्व. पै. किसनराव डोंगरे बहुउद्देशीय संस्था, श्री नवनाथ युवा मंडळ, धर्मवीर ग्रामीण सार्वजनिक वाचनालय आणि पै. नाना डोंगरे व्यायाम शाळा यांच्या संयुक्त विद्यमाने करण्यात आले होते.
कार्यक्रम यशस्वी करण्यासाठी पै. नाना किसन डोंगरे, सौ. मंदाताई नाना डोंगरे, कु. प्रतिभा नाना डोंगरे आणि पै. संदीप नाना डोंगरे यांनी विशेष परिश्रम घेतले. कार्यक्रमाचे निवेदन संदीप बापू रासकर यांनी प्रभावी शैलीत केले.
मल्हारी खुडे यांच्या या सन्मानाबद्दल विविध स्तरातून अभिनंदन होत असून, त्यांच्या पुढील सामाजिक, शैक्षणिक आणि संघटनात्मक कार्यासाठी शुभेच्छांचा वर्षाव होत आहे.
