करळ-सावरखार ग्रामपंचायतीतर्फे तरुणांच्या शारीरिक विकासासाठी उभारण्यात आलेल्या अत्याधुनिक आणि सुसज्ज व्यायामशाळेचे लोकार्पण महेश बालदी यांच्या शुभहस्ते संपन्न झाले. या भव्य व्यायामशाळेमुळे परिसरातील युवकांमध्ये उत्साहाचे वातावरण निर्माण झाले आहे.
कार्यक्रमात बोलताना आमदार महेश बालदी म्हणाले, “करळ-सावरखार ग्रामपंचायतीचे हे कार्य कौतुकास्पद असून इतर ग्रामपंचायतींनी यांचा आदर्श घ्यावा. या यशाचे श्रेय सरपंच, उपसरपंच आणि सर्व ग्रामपंचायत सदस्यांना जाते.”
या कार्यक्रमास उरण उपनगराध्यक्ष रवी भोईर, सोनारीचे माजी सरपंच महेश कडू, धनेश गावंड, ग्रामपंचायतीचे माजी सदस्य महेश घरत, सावरखारचे माजी अध्यक्ष जितेंद्र ठाकूर, अनिल घरत, करळचे माजी अध्यक्ष सुरज तांडेल, पत्रकार विकास कडू तसेच शेकडो ग्रामस्थ उपस्थित होते.
सुमारे ६५ लाख रुपये खर्चून ही अत्याधुनिक व्यायामशाळा उभारण्यात आली आहे. गावातील युवकांना तालुक्याबाहेर जाऊन व्यायाम करावा लागू नये, या उद्देशाने ही सुविधा निर्माण करण्यात आली आहे.
या व्यायामशाळेचे स्वप्न करळ-सावरखारचे माजी सरपंच अरविंद तांडेल यांनी आपल्या कार्यकाळात पाहिले होते. आर्थिक अडचणींमुळे त्यावेळी हे काम पूर्ण होऊ शकले नव्हते. मात्र त्यांची पत्नी आणि विद्यमान सरपंच अनिता तांडेल यांच्या कार्यकाळात हे स्वप्न पूर्ण झाल्याने त्यांनी आनंद व्यक्त केला.
उपसरपंच जितेंद्र घरत यांनीही या व्यायामशाळेसाठी विशेष पुढाकार घेतला. या प्रकल्पासाठी सरपंच अनिता तांडेल, उपसरपंच जितेंद्र घरत, सदस्य देवानंद तांडेल, चंद्रकांत तांडेल, प्रवीण घरत, मेघा ठाकूर, हर्षा घरत, तेजश्री कडू, रिंकू घरत आणि अश्मिता घरत यांनी विशेष मेहनत घेतली.
कार्यक्रमाचे सूत्रसंचालन प्रसिद्ध निवेदक अतिश पाटील यांनी केले, तर आभार प्रदर्शन हसुराम घरत यांनी केले.
