खामगाव प्रतिनिधी
समृद्धी महामार्गावर शुक्रवारी पहाटे भीषण अपघात घडला असून, या अपघातात खामगाव येथील माजी नगरसेविकेचे पुत्र गुलजमा शहा गंभीर जखमी झाले आहेत. त्यांच्या पायाला गंभीर दुखापत झाली असून त्यांच्यावर कल्याण येथील रुग्णालयात उपचार सुरू आहेत.
मिळालेल्या माहितीनुसार, गुलजमा शहा हे मुंबईहून खामगावकडे आपल्या थार गाडीने प्रवास करत होते. शहापूर परिसरात वाहनचालकाला डुलकी लागल्याने गाडीवरील नियंत्रण सुटले आणि समोरून येणाऱ्या ट्रकला जोरदार धडक बसली. त्यानंतर वाहन दुभाजकावर जाऊन आदळले.
अपघाताची माहिती मिळताच स्थानिक नागरिकांनी तातडीने मदतकार्य सुरू करत गुलजमा शहा यांना कल्याण येथील वृंदावन हॉस्पिटलमध्ये दाखल केले. त्यांच्या पायाला गंभीर दुखापत झाली असून डॉक्टरांकडून उपचार सुरू आहेत. आज सायंकाळी त्यांच्या पायावर शस्त्रक्रिया होण्याची शक्यता असल्याची माहिती सूत्रांनी दिली.
मुंबई येथे कामानिमित्त जाऊन परत येत असताना हा अपघात झाल्याचे सांगितले जात आहे.
