लोणी | प्रतिनिधी –
लोणी गावात आयोजित ग्रामसभेत ग्रामस्थांनी मोठ्या संख्येने उपस्थित राहत अवैध दगड खाणपट्टा, क्रशर आणि दगड वाहतुकीविरोधात तीव्र नाराजी व्यक्त केली. ग्रामसभेत या विषयावर सविस्तर चर्चा करण्यात आली असून अवैध खाणपट्टा, क्रशर आणि दगड वाहतूक पूर्णपणे बंद करण्याचा ठराव एकमताने मंजूर करण्यात आला.
ग्रामस्थांनी सांगितले की, गावातील दगड खाण, क्रशर आणि दगड वाहतुकीमुळे नागरिक, शेतकरी आणि परिसरातील ग्रामस्थांना मोठ्या प्रमाणात त्रास सहन करावा लागत आहे. क्रशरमधून उडणारी धूळ शेतीवर साचत असल्याने पिकांचे नुकसान होत असून अनेक शेतजमिनींची उत्पादकता घटल्याची तक्रार ग्रामसभेत करण्यात आली. काही ठिकाणी जमीन नापीक होण्याची भीतीही व्यक्त करण्यात आली.
तसेच परिसरातील पिण्याच्या पाण्याचे स्रोत दूषित होत असल्याने नागरिकांच्या आरोग्याचाही प्रश्न निर्माण झाला आहे. दगड वाहतुकीसाठी वापरण्यात येणारा लोणी-वाफगाव मार्ग हा रस्ता शाळा, मंदिर आणि शेती क्षेत्रालगत असल्याने अवजड वाहनांच्या वाहतुकीमुळे नागरिकांना सतत धोक्याचा सामना करावा लागत असल्याचे ग्रामस्थांनी नमूद केले.
या प्रकरणात सर्वप्रथम सुखदेव आढाव यांनी तक्रार दाखल केली होती. त्यानंतर ग्रामसभा ठराव, ग्रामपंचायत नोंदी आणि संबंधित कागदपत्रांच्या पडताळणीत अनेक विसंगती आढळल्याचे प्रशासनाच्या अहवालातून समोर आले आहे. ग्रामसभेतील ठरावाची नोंद ग्रामपंचायत इतिवृत्त नोंदवहीत नसल्याचे तसेच संबंधित अर्जाची आवक नोंद उपलब्ध नसल्याचे स्पष्ट करण्यात आले. तत्कालीन सरपंच आणि ग्रामसेवक यांनीही संबंधित ठरावाची प्रत आपण दिली नसल्याचे जबाबात नमूद केले आहे.
दरम्यान, ग्रामसभेत खाण मालक आणि ग्रामस्थांमध्ये शाब्दिक चकमक झाल्याचेही समोर आले. खाण मालकाने शासनाकडे मोठ्या प्रमाणावर रॉयल्टी भरल्याचा तसेच ग्रामपंचायतीच्या परवानगीनंतरच खाण आणि क्रशर व्यवसाय सुरू केल्याचा दावा केला. तसेच व्यवसायात मोठी आर्थिक गुंतवणूक केल्याचे सांगत भविष्यात खाणपट्टा बंद झाल्यास होणाऱ्या नुकसानीला जबाबदार कोण, असा सवाल उपस्थित केला.
मात्र ग्रामस्थांनी यास ठाम विरोध दर्शवत ग्रामपंचायत किंवा गावकरी जबाबदार राहणार नसल्याचे स्पष्ट केले. तसेच अवैध खाणपट्टा, क्रशर आणि दगड वाहतूक बंद न झाल्यास आंदोलन छेडण्याचा इशाराही देण्यात आला.
या ग्रामसभेला आजी-माजी सरपंच, उपसरपंच, ग्रामपंचायत सदस्य, विविध मान्यवर, वरिष्ठ नेते तसेच २५० ते ३०० हून अधिक ग्रामस्थ उपस्थित होते. महिलांची उपस्थितीही विशेष लक्षणीय होती. ग्रामसभेच्या अखेरीस सर्वांच्या एकमताने अवैध खाणपट्टा, क्रशर आणि दगड वाहतूक बंद करण्याचा ठराव मंजूर करण्यात आला.
