डम्पिंग ग्राऊंडजवळ भीषण अपघात, चालक ताब्यात
पुसद | वार्ताहर
पुसद शहराजवळील इंदिरानगर परिसरातील डम्पिंग ग्राऊंडजवळ सोमवारी सकाळी झालेल्या भीषण अपघातात दोन जणांचा जागीच मृत्यू झाला, तर एक महिला गंभीर जखमी झाली. भरधाव वेगाने येणाऱ्या टिप्परने दोन दुचाकींना जोरदार धडक दिल्याने हा अपघात घडला.
मृतांमध्ये अरविंद प्रल्हाद राठोड (वय ४०, रा. कोठारी ता. महागाव) आणि गणेश विष्णू जाधव (वय २९, रा. काटखेडा) यांचा समावेश आहे. गणेश जाधव हे होमगार्ड जवान असून पुसद येथील फुलसिंग नाईक महाविद्यालयात प्रशिक्षणासाठी आले होते.
या अपघातात अरविंद राठोड यांच्या पत्नी अनिता राठोड (वय ३५) गंभीर जखमी झाल्या असून त्यांच्या दोन्ही पायांना फ्रॅक्चर झाले आहे. त्यांच्यावर पुसद उपजिल्हा रुग्णालयात उपचार सुरू आहेत.
पोलिसांनी दिलेल्या माहितीनुसार, एमएच २९ बीई ७५७० क्रमांकाचा टिप्पर चालक भारत शंकर पवार (वय २८, रा. काटखेडा) याने वाहन भरधाव व निष्काळजीपणे चालवून दोन दुचाकींना धडक दिली. अपघात इतका भीषण होता की एका मृताचा मृतदेह छिन्नविछिन्न झाला, तर दुसऱ्याच्या डोक्याला गंभीर दुखापत झाली.
घटनेनंतर काही काळ परिसरात वाहतूक कोंडी निर्माण झाली होती. शहर पोलिसांनी तातडीने घटनास्थळी धाव घेत चालकाला ताब्यात घेतले असून टिप्पर जप्त करण्यात आला आहे. संबंधित चालकाविरोधात गुन्हा दाखल करण्याची प्रक्रिया सुरू असल्याची माहिती पोलिसांनी दिली.
दोन्ही मृतदेह शवविच्छेदनासाठी पुसद उपजिल्हा रुग्णालयात पाठवण्यात आले आहेत.
