📍 चामोर्शी | प्रतिनिधी
युवासेना तालुकाप्रमुख अविनाश पुच्छलवार यांनी गडचिरोली जिल्ह्यात उभारण्यात येत असलेल्या लोहप्रकल्पावर गंभीर आरोप करत, हा प्रकल्प स्थानिक बेरोजगार आणि शेतकऱ्यांच्या जिवावर उठत असल्याचे म्हटले आहे.
मिळालेल्या माहितीनुसार, Lloyds Metals and Energy Limited च्या कोनसरी येथील प्रकल्पात स्थानिक युवकांना रोजगार देण्याऐवजी बाहेरील राज्यातील व्यक्तींना प्राधान्य दिले जात असल्याचा आरोप करण्यात आला आहे. स्थानिक युवकांना केवळ सुरक्षा रक्षक, वाहन चालक किंवा मजूर यांसारख्या पदांवर नियुक्त केले जात असल्याची नाराजी व्यक्त होत आहे.
“शेती असेल तरच नोकरी मिळेल,” असे कंपनीचे अधिकारी स्पष्ट सांगत असल्याचा दावाही अविनाश पुच्छलवार यांनी केला. रोजगाराच्या आशेने अनेक युवक दररोज कंपनी कार्यालयात फेऱ्या मारत असले तरी त्यांच्या हाती निराशाच लागत असल्याचे त्यांनी म्हटले आहे.
दलालांकडून शेतकऱ्यांची दिशाभूल?
लोहप्रकल्पासाठी जमीन खरेदी प्रक्रियेत काही दलाल सक्रिय असून, ते शेतकऱ्यांना जास्त मोबदला आणि नोकरीचे आमिष दाखवत असल्याचा आरोपही करण्यात आला आहे. काही ठिकाणी “जमीन दिली नाही तर सरकार ती ताब्यात घेईल” अशी भीती दाखवून दबाव आणला जात असल्याचा दावा करण्यात आला.
स्थानिक शेतकरी भूमिहीन होत असून, त्यांना कमी पगारावर कंपनीत काम करावे लागत असल्याने “मालक ते नोकर” अशी अवस्था झाल्याची टीका करण्यात आली आहे.
दरम्यान, परिसरातील नागरिकांनी संघटित होऊन या प्रश्नावर मोठे आंदोलन उभारण्याची गरज असल्याचे आवाहन अविनाश पुच्छलवार यांनी केले आहे.
