📍 आळंदी | प्रतिनिधी
श्री ज्ञानेश्वर महाराज संस्थान मंदिर येथील दानपेटीतील रक्कम अपहार प्रकरणी आळंदी पोलीस स्टेशन येथे गुन्हा दाखल करण्यात आला असून आरोपी विशाल बाळू वारुळे (वय ३३, रा. चोवीसवाडी, ता. हवेली) याला पोलिसांनी तात्काळ अटक केली आहे.
या प्रकरणी देवस्थानचे व्यवस्थापक ज्ञानेश्वर महादेव वीर यांनी फिर्याद दिली आहे. मंदिरातील दानपेटीत जमा होणारी रोकड सुरक्षितपणे जमा करण्याची जबाबदारी आरोपीकडे होती. मात्र गेल्या काही महिन्यांपासून दानपेटीतील रक्कम अपहार केल्याचा प्रकार उघडकीस आला.
पोलिसांनी केलेल्या तपासादरम्यान आरोपीच्या घरातून विविध मूल्यांच्या नोटांनी भरलेल्या पिशव्या जप्त करण्यात आल्या असून लाखो रुपयांची रोकड हस्तगत करण्यात आल्याची माहिती समोर आली आहे.
या घटनेमुळे आळंदी परिसरात मोठी खळबळ उडाली असून पोलिसांकडून पुढील तपास सुरू आहे.
