प्रतिनिधी मिरज :
मिरज तालुक्यातील म्हैसाळ येथील एका आलिशान बारवर मिरज ग्रामीण पोलिसांनी सोमवारी रात्री उशिरा छापा टाकत मोठी कारवाई केली. कोल्हापूरसह परजिल्ह्यातील तरुणींना बोलावून ‘व्हीआयपी सर्व्हिस’ दिली जात असल्याची माहिती पोलिसांना मिळाल्यानंतर ही धाड टाकण्यात आली.
छाप्यादरम्यान बारमध्ये काही तरुणी तसेच मद्यधुंद अवस्थेतील ग्राहक आढळून आले. पोलिसांनी संबंधितांना ताब्यात घेऊन चौकशी सुरू केली आहे. प्राथमिक माहितीनुसार, संबंधित ठिकाणी डान्सबार स्वरूपाचे प्रकार सुरू असल्याचा संशय व्यक्त करण्यात येत आहे.
या कारवाईनंतर बार परिसरात काही काळ खळबळ उडाली होती. मिरज ग्रामीण पोलिसांकडून बारचालकाविरोधात कायदेशीर कारवाईची प्रक्रिया सुरू असून, या प्रकरणातील अधिक तपास सुरू आहे.
