खामगाव : शिवसेना उद्धव बाळासाहेब ठाकरे पक्षाच्या खामगाव तालुका व शहर शाखेच्या वतीने पेट्रोल, डिझेल व घरगुती गॅस सिलेंडरच्या दरवाढीविरोधात निषेध आंदोलन करण्यात आले. यावेळी शेतकरी, विद्यार्थी, शेतमजूर व सर्वसामान्य नागरिकांच्या विविध समस्यांबाबत शासनाकडे निवेदन सादर करण्यात आले.
तहसीलदार सुनील पाटील यांना देण्यात आलेल्या निवेदनात शेतकऱ्यांना शेती मशागतीसाठी ट्रॅक्टरसाठी लागणारे डिझेल कॅनमध्ये उपलब्ध करून देण्याची मागणी करण्यात आली. तसेच पेट्रोल पंपांवर उपलब्ध इंधन साठ्याची माहिती लेखी स्वरूपात लावावी, गॅस सिलेंडरसाठी लागणाऱ्या रांगांवर नियंत्रण ठेवण्यासाठी प्रशासनाने योग्य नियोजन करावे, अशी मागणीही करण्यात आली.
यावेळी नीट वैद्यकीय प्रवेश परीक्षेच्या पेपरफुटी प्रकरणावर संताप व्यक्त करत दोषींवर कठोर कारवाई करून तातडीने अटक करण्याची मागणी करण्यात आली. विद्यार्थ्यांचे मोठे शैक्षणिक नुकसान झाल्याने संबंधित आरोपींना कठोर शिक्षा देण्यात यावी, असे आंदोलनकर्त्यांनी म्हटले.
निवेदनातील प्रमुख मागण्या पुढीलप्रमाणे —
- पेट्रोल, डिझेल व घरगुती गॅस सिलेंडरच्या वाढीव दरांचा पुनर्विचार करावा.
- शेतकऱ्यांना ट्रॅक्टरसाठी डिझेल कॅनमध्ये देण्यास परवानगी द्यावी.
- नीट पेपरफुटी प्रकरणातील दोषींना त्वरित अटक करून कठोर शिक्षा द्यावी.
- खत व बियाण्यांचा तुटवडा टाळून शेतकऱ्यांना मुबलक पुरवठा करावा.
- रखडलेली पीक विम्याची रक्कम तातडीने शेतकऱ्यांच्या खात्यात जमा करावी.
- पेट्रोल व डिझेल पंपांवरील उपलब्ध साठ्याची माहिती सार्वजनिक करावी.
या सर्व मागण्या तातडीने मान्य न झाल्यास शिवसेनेच्या वतीने तीव्र आंदोलन छेडण्याचा इशाराही देण्यात आला.
या आंदोलनात शिवसेना तालुकाप्रमुख श्रीराम खेलदार, शहरप्रमुख रवि जैन, ज्येष्ठ शिवसैनिक सुभाष ठाकूर, युवा सेना तालुका प्रमुख राहुल मानमोडे, उपतालुकाप्रमुख प्रकाश पवार, मोहनसिंग इंगळे, हेमंत खारोडे, विभागप्रमुख रामेश्वर लाहुडकर, शाखाप्रमुख ज्ञानदेव रोटे, सुनील नेमाडे, दीपक कांबळे, संतोष सांगळे, संदीप केव्हारे, मोतीराम गावंडे, संजय बुंदे, शुभम बावस्कार, पवन भाऊ, अजय दुतोंडे यांच्यासह अनेक शिवसैनिक व पदाधिकारी उपस्थित होते.
