गडचिरोली जिल्ह्यातील पाथ्रड गोळे ग्रामपंचायतीने महाराष्ट्र शासनाच्या मुख्यमंत्री समृद्ध पंचायतराज अभियानात उल्लेखनीय यश संपादन करत तालुकास्तरावर प्रथम क्रमांक पटकावला असून ग्रामपंचायतीला ₹१५ लाखांचे पारितोषिक जाहीर करण्यात आले आहे. या यशानंतर ग्रामपंचायतीची निवड जिल्हास्तरीय स्पर्धेसाठी करण्यात आली आहे.
या पार्श्वभूमीवर जिल्हा परिषद गडचिरोलीचे मुख्य कार्यकारी अधिकारी मा. सुहास गाडे यांच्या अध्यक्षतेखालील जिल्हास्तरीय मूल्यमापन समितीने गावाला भेट देत विविध विकासकामांची प्रत्यक्ष पाहणी केली. समितीने स्वच्छता, घनकचरा व सांडपाणी व्यवस्थापन, आरोग्य, शिक्षण, महिला व बालविकास, पर्यावरण संवर्धन तसेच ग्रामपंचायतीमार्फत राबविण्यात येणाऱ्या विविध नाविन्यपूर्ण उपक्रमांचे सखोल मूल्यमापन केले.
यावेळी समितीने जिल्हा परिषद शाळा, अंगणवाडी केंद्र, ग्रामवाचनालय तसेच विविध शासकीय योजनांचा लाभ घेतलेल्या दिव्यांग लाभार्थ्यांच्या घरी भेट देऊन प्रत्यक्ष पडताळणी केली. लाभार्थ्यांशी संवाद साधून योजनांची अंमलबजावणी आणि परिणामकारकतेची माहिती घेतली.
ग्रामपंचायतीने राबविलेल्या विकासात्मक व लोकहितकारी उपक्रमांचे समिती सदस्यांनी विशेष कौतुक केले. या यशामध्ये ग्रामस्थ, लोकप्रतिनिधी, ग्रामपंचायत सदस्य, अधिकारी व कर्मचारी यांचे मोलाचे योगदान असल्याची भावना व्यक्त करण्यात आली.
ग्रामस्थांची एकजूट, सक्रिय सहभाग आणि विकासाभिमुख दृष्टिकोन यामुळे आदर्श ग्रामपंचायत पाथ्रड गोळेने जिल्हास्तरावर वेगळी ओळख निर्माण केली असून आगामी काळातही गावाच्या सर्वांगीण विकासासाठी असेच सहकार्य कायम राहावे, अशी अपेक्षा ग्रामपंचायतीच्या वतीने व्यक्त करण्यात आली.
