दापोली | प्रतिनिधी
दापोली तालुक्यातील हर्णे बंदर परिसरातील गोवा किल्ला येथे दोन तरुणांवर झालेल्या सामूहिक मारहाणीच्या घटनेने परिसरात खळबळ उडाली आहे. काल सायंकाळच्या सुमारास १० ते १२ जणांच्या टोळक्याने दोन मुलांना बेदम मारहाण केल्याची घटना घडली असून या प्रकरणी पोलिसांनी तातडीने कारवाई करत पाच आरोपींना अटक केली आहे. तसेच एका अल्पवयीन आरोपीला ताब्यात घेण्यात आले आहे.
घटनेची माहिती मिळताच उपविभागीय पोलीस अधिकारी (SDPO) व पोलीस निरीक्षक (PI) यांनी तात्काळ घटनास्थळी धाव घेत परिस्थिती नियंत्रणात आणली. जखमी तरुणांना त्वरित रुग्णालयात दाखल करण्यात आले असून त्यांच्यावर उपचार सुरू आहेत. सध्या दोघांची प्रकृती स्थिर असल्याची माहिती पोलिस प्रशासनाकडून देण्यात आली.
रत्नागिरी जिल्हा पोलीस अधीक्षक नितीन बगाटे यांनी या घटनेची पुष्टी करत सांगितले की, प्रकरणाची सखोल चौकशी सुरू असून आणखी काही आरोपींचा शोध घेतला जात आहे.
दरम्यान, घटनेनंतर हर्णे व दापोली परिसरात तणावपूर्ण वातावरण निर्माण होऊ नये यासाठी पोलिसांकडून बंदोबस्त वाढवण्यात आला आहे. नागरिकांनी अफवांवर विश्वास ठेवू नये तसेच कायदा व सुव्यवस्था अबाधित राखण्यासाठी पोलिसांना सहकार्य करावे, असे आवाहनही पोलीस प्रशासनाकडून करण्यात आले आहे.
