पुणे : महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२६ मध्ये झालेल्या माध्यमिक शालान्त प्रमाणपत्र (इयत्ता १० वी) परीक्षेच्या गुणपत्रक, प्रमाणपत्र आणि इतर शैक्षणिक साहित्याच्या वाटपाबाबत महत्त्वाचे निर्देश जारी केले आहेत.
राज्य मंडळाचे सचिव डॉ. दिपक माळी यांनी जारी केलेल्या पत्रानुसार, सर्व विभागीय मंडळांनी आपल्या कार्यक्षेत्रातील मान्यताप्राप्त माध्यमिक शाळांना सोमवार, दि. १ जून २०२६ रोजी सकाळी ११.०० वाजता गुणपत्रक, प्रमाणपत्रे आणि तपशीलवार गुण दर्शविणारे शालेय अभिलेख वितरित करावेत.
तसेच, संबंधित माध्यमिक शाळांनी हे साहित्य प्राप्त झाल्यानंतर त्याच दिवशी दुपारी ३.०० वाजता विद्यार्थ्यांना गुणपत्रक व प्रमाणपत्रांचे वाटप करावे, असे स्पष्ट निर्देश देण्यात आले आहेत.
राज्य मंडळाने सर्व विभागीय मंडळांना याबाबत आवश्यक नियोजन करण्यास सांगितले असून, ही माहिती त्यांच्या कार्यक्षेत्रातील सर्व संबंधित माध्यमिक शाळांपर्यंत पोहोचविण्याचे निर्देशही दिले आहेत. तसेच याबाबत करण्यात आलेल्या कार्यवाहीचा अहवाल राज्य मंडळाकडे सादर करण्यास सांगण्यात आले आहे.
ही सूचना महाराष्ट्र राज्य माध्यमिक व उच्च माध्यमिक शिक्षण मंडळाच्या अध्यक्षांच्या मान्यतेने जारी करण्यात आली असून विद्यार्थी, पालक आणि शाळांसाठी महत्त्वाची ठरणार आहे.
