प्रतिनिधी –
कांद्याला प्रतिकिलो २५ रुपये हमीभाव देण्यात यावा, यापूर्वी विक्री झालेल्या कांद्याला १५ ते २० रुपये प्रतिकिलो अनुदान जाहीर करावे तसेच केंद्र सरकारने घोषित केलेल्या २ लाख टन कांदा खरेदीच्या मर्यादेत वाढ करून ८ ते १० लाख टन कांदा खरेदी करावी, या प्रमुख मागण्यांसाठी आंबेगाव तालुक्यातील पुणे-नाशिक महामार्गावर कांदा उत्पादक शेतकऱ्यांनी भव्य रास्ता रोको आंदोलन केले.
कांदा उत्पादक शेतकऱ्यांच्या विविध प्रश्नांकडे शासनाचे लक्ष वेधण्यासाठी आयोजित करण्यात आलेल्या या आंदोलनात मोठ्या संख्येने शेतकरी सहभागी झाले होते. आंदोलनस्थळी शेतकऱ्यांनी आपल्या मागण्यांच्या समर्थनार्थ घोषणाबाजी करत शासनाकडे तातडीने सकारात्मक निर्णय घेण्याची मागणी केली.
यावेळी राष्ट्रवादी काँग्रेस पक्ष (शरदचंद्र पवार) प्रदेशाध्यक्ष श्री. शशिकांत शिंदे, काँग्रेस प्रदेशाध्यक्ष श्री. हर्षवर्धन सपकाळ, खासदार श्री. निलेश लंके, आमदार श्री. बापूसाहेब पठारे, माजी आमदार श्री. अशोक पवार, श्री. अतुल बेनके तसेच राष्ट्रवादी काँग्रेस पक्ष (शरदचंद्र पवार) पुणे जिल्हाध्यक्ष श्री. देवदत्त निकम यांच्यासह महाविकास आघाडीतील विविध घटक पक्षांचे पदाधिकारी, कार्यकर्ते आणि शेतकरी मोठ्या संख्येने उपस्थित होते.
उपस्थित नेत्यांनी शेतकऱ्यांच्या मागण्या रास्त असल्याचे सांगत कांदा उत्पादकांना योग्य दर, अनुदान आणि शासकीय मदत मिळावी, अशी भूमिका मांडली. कांद्याच्या घसरलेल्या दरामुळे शेतकऱ्यांना मोठे आर्थिक नुकसान सहन करावे लागत असल्याने शासनाने तातडीने हस्तक्षेप करून दिलासा द्यावा, अशी मागणी करण्यात आली.
शेतकऱ्यांच्या मागण्या मान्य होईपर्यंत आंदोलन सुरू ठेवण्याचा निर्धार आंदोलनकर्त्यांनी व्यक्त केला.
