उरण | प्रतिनिधी –
रायगड जिल्ह्यात सामाजिक, सांस्कृतिक आणि आध्यात्मिक क्षेत्रात उल्लेखनीय योगदान देणारे ह.भ.प. अंकुश महाराज कुमठेकर यांना विविध संस्थांकडून एकाच कार्यक्रमात तीन प्रतिष्ठित पुरस्कारांनी सन्मानित करण्यात आले. या विशेष गौरवामुळे परिसरात आनंदाचे वातावरण निर्माण झाले आहे.
Child Care Samajik Sanstha Raigad यांच्या वतीने अंकुश महाराज यांना ‘रायगड विशेष सन्मान’ पुरस्कार प्रदान करण्यात आला. तसेच Aawaz Mahamumbaicha Channel यांच्या वतीने ‘महा गौरव’ पुरस्काराने गौरविण्यात आले. याशिवाय Dronagiri Sports Association Uran यांनीही त्यांचा विशेष सन्मान केला.
या तिहेरी सन्मानाबद्दल प्रतिक्रिया व्यक्त करताना ह.भ.प. अंकुश महाराज म्हणाले, “अधिक मासात तीन पुरस्कारांनी सन्मानित होणे म्हणजे माझ्यासाठी त्रिवेणी संगमच आहे.”
यावेळी त्यांनी चाईल्ड केअर सामाजिक संस्थेच्या कार्याचे विशेष कौतुक केले. आदिवासी वाड्यांमध्ये संस्था राबवत असलेल्या विविध समाजोपयोगी उपक्रमांचे त्यांनी अभिनंदन करत संस्थापक अध्यक्ष विकास कडू आणि त्यांच्या संपूर्ण टीमचे कौतुक केले.
गेल्या नऊ वर्षांपासून चाईल्ड केअर सामाजिक संस्था रायगड जिल्ह्यात विविध सामाजिक उपक्रम राबवत असून, विविध क्षेत्रांत उल्लेखनीय कार्य करणाऱ्या व्यक्तींना ‘रायगड विशेष’ पुरस्काराने गौरवित आहे.
ह.भ.प. अंकुश महाराज कुमठेकर यांना यापूर्वी कोकण रत्न, कला रत्न आणि कला गौरव यांसारख्या पुरस्कारांनीही सन्मानित करण्यात आले आहे. काही महिन्यांपूर्वी त्यांनी शारजा, दुबई येथे आयोजित भजन कार्यक्रमात गायन सेवा दिली होती. सध्या ते परमपूज्य सद्गुरु दादा महाराज मोरे माऊली यांच्यासोबत गायन सेवा बजावत असून महाराष्ट्रातील अनेक नामवंत कीर्तनकारांना गायन-वादनाची साथ देत आहेत. आगामी सप्टेंबर महिन्यात त्यांना यूकेमधील London येथे गायनासाठी जाण्याची संधी लाभणार आहे.
कोकणातील संत परंपरेचे वारसदार असलेल्या अंकुश महाराजांनी अल्पवयातच वारकरी संप्रदायात स्वतःचे वेगळे स्थान निर्माण केले आहे. त्यांच्या नेतृत्वाखालील हरिपाठ आणि भजन सेवा विशेष आकर्षण ठरत आहेत.
पुरस्कार वितरण समारंभात चाईल्ड केअर सामाजिक संस्थेचे संस्थापक-अध्यक्ष विकास कडू, आवाज महामुंबईचा चॅनेलचे संपादक मिलिंद खारपाटील आणि द्रोणागिरी स्पोर्ट्स असोसिएशनचे अध्यक्ष महादेव घरत यांच्या हस्ते सन्मानचिन्ह प्रदान करण्यात आले.
कार्यक्रमास पत्रकार, सामाजिक संस्थांचे पदाधिकारी, द्रोणागिरी स्पोर्ट्स असोसिएशनचे सदस्य तसेच विविध क्षेत्रांतील शेकडो नागरिक उपस्थित होते. कार्यक्रमाचे सूत्रसंचालन रमाणिक म्हात्रे यांनी केले तर आभार प्रदर्शन मिलिंद खारपाटील यांनी मानले.
